عينى علينا لما نكبر 

ونحتاج لغيرنا أكتر 
وشمسنا خلاص بتغرب 
والكل منا يزهق ويهرب 
لما ننادى وماحد يسمع 
والعيون تبكى وتدمع 
لما نتقسم ع الولاد 
ويقولوا دا حمل زاد 
واحد يقول انا زهقان 
والتانى يشتكى عيان
تسمع صوت جاى م الحجره
يظهر فيه بينهم مشاجره 
ويحصل بسببك الخلاف 
ومحدش على شعورك يخاف 
تسمع وتشوف من سكات 
اهلك بيستنوا الممات 
ويبقى الحل ف كلمتين 
هما .. دار المسنين 
ولما تستنى يزوروك 
وتلاقيهم يوم نسوك 
ولما تنام صعبان عليك 
والدموع باينه فعنيك 
وتسأل زميلك فى الحجره 
سؤال بتقولو كل مره 
أمال فين ياعم الوفاء 
فين المحبه وفين الولاء
يجاوبك وحاسس باستياء
جايز هنلقاه فى السماء