جارى التحميل
استخدم زر ESC أو رجوع للعودة
صباح ظريف بابو العريف
هتقولنا إيه النهارده
لسان حريف عقل خفيف
غاوى المناهده والمعارضه
نقول يمين تقول شمال
أهم حاجه تختلف
تقبض فجيبك الأموال
واحنا نتنيل نستلف
سياسى إيه ونيلة إيه
ياللى لسانك يجيب ورا
عمال ليلاتى تسب ليه
ولا شوفنا غير النقوره
لو ربنا ياخد لسانك
ويديلك بدالو دراع
كان زمانك عنتر زمانك
تنفعنا لو فيه صراع
هيفيد بإيه عسلك وشهدك
وكلامك الحلو المليح
ورينا عرقك وللا جهدك
متوريناش انك فصيح
إتنيل نام خلينا ننام
خلى فصاحتك ليك لوحدك
زهقنا من كتر الكلام
وقف لسانك عند حدك
مفيش فايده م الكلام
غير ان سيادتك تتعرف
مش بردو دا يبقى حرام
ناس تتعرف ناس تتقرف
آه ياودانى مستحملانى
فاتحك لكل اهبل ورخيص
يقول كلام ويعيدو تانى
فى كل زفه عمال يهيص
شمر وساعد ياللى قاعد
عمال تلكلك بالكلام
بلدنا تبنيها السواعد
مش أى برطمه والسلام