خلى اللى ساكت مطرحه 
متكلموش ولا تفتحه 
أقل حاجه بتجرحه
وأقل حاجه تفرحه
سيب اللى ناسى ناسى
متقلبلوش مقاسى 
يمكن نعسان وناسى
مين ياخدو يروحه
دا كل شيئ بحساب 
آه م الحبيب لو ساب 
وقفل وراه الباب
واللى انجمع نطرحه
خلوه نايم .. دا باين
لف اللفات وعاين
مستنى طرح الجناين 
والورد يفتحه
سيبوه عايش فحلمه 
ومعاه ورقه وقلمه 
متفكروهوش بألمه
خلوا الزمان يمسحه
أصل اللقا دا نصبب
عينى عليه دا غريب 
مش لاقى جنبو حبيب
ولا حد بيلمحه 
عاملوه بحبة حذر
لو تفهموه ينعذر 
عمر الإزاز منكسر 
وعرفنا نصلحه
قاعد مستنى بكره 
زاده اللى فات وزكرى
متخبطوش على فكره
ولا حد يصحصحه 
سيبوه يصحى على مهله
هيفوق ويعرف أهله
شافو الزمن واتجاهله
وعيونو مفتحه