أنا الطبيب وهطببك 
هكشف عليك واخففك
بس الأول هقلبك 
مش هخلى معاك مليم
أسمع يا أستاذ فرحات
تحب تعيش وانتا شحات 
وللا غنى ويا الأموات
وكان الله بالسر عليم
عيادتى جنب المستشفى 
بعون الله لو جيت تشفى
إوعى تكون الحاله ناشفه
ليبقى فيها سين وجيم
عيان وعايزنى اروح البيت
إتنرفزت عليه وسبيت
ولو الحيط لازق الحيط 
دا مبدأ وعليه تصميم
إسمعى ياست ام عليه
عندك عمليه بألف وميه
لو ببلاش هتموتى فى إيديه
خلينا نعمل شغل سليم
فاكره الواد محمود القص
استكتر الأجره وبص
نسيت جواه مشرط ومقص
قولى عليه يارحمن يارحيم
هاتلى البنج وقطن وشاش
عشى التمرجى دا متعشاش 
معادش حاجه ياعم بلاش
إهدى شويه خليك حليم
شوفى يا سستر إنتى وهيه 
زودناها تسعين فى الميه 
عشان نجيب أحدث عربيه
قولوا يا فتاح يا عليم
عملنا خلاص كل اللى علينا
على جثث المرضى وعدينا 
وشرينا فيلا فى مارينا
فى الصيف نتفسح ونقيم
وسط الألف فينا واحد 
يعرف ربه ومهش جاحد
عندو ضمير ويخاف الواحد
علشان كدا بنقول دا حكيم