مين اللى فيكم بص لفوق 
مين اللى دوب الفروق
خلاص ياباشا هعترف 
أنا اللى جانى ومقترف 
أنا الفقير ليا الشرف
وانا اللى يوم بصيت لفوق
أنا الغلبان طيب وصالح 
كنت سارح فى المطارح 
والزرع كان أخضر وطارح 
كان نفسى بس ساعتها ادوق 
قلت الزمن جابلى هديه 
بصيت لها ومديت إيديه 
بعد شويه قالوا مش ليه 
دى بتاع الناس اللى فوق
أنا اللى قلت العيشه مره 
وانا اللى حاولت اخرج لبره
وقلت اجيب آخر المجره
وعملت فالح وابن سوق
أتارى كنت احرت ف ميه 
والكتير غير الشويه
والحكايه مش عاديه 
دا دم بيجرى فى العروق
اللعبه ليها قانون وقواعد
اللى واقف غير اللى قاعد
عشان تقوم محتاج مساعد
ميكونش معاك كارت ومحروق 
خلاص كدا عرفت وارتحت 
إن اللى تحت هيفضل تحت
وابقى عيل لو فتحت 
بقى وقلت انا ليا شوق
خلاص فهمت واتعلمت 
وتبت عن ذنبى وندمت
وابقى اضربنى لو اتكلمت 
بس اهدى حضرتك وروق 
عمرى تانى مبص لفوق
فوق