متصعبش عليا المسائل
وتضيع وقتك من غير طائل 
لو عاقل إدينى بدائل
متكتفنيش وتقولى عوم
كل اللى على البر شاطر
آخر ماعندو يقول بنشاطر
لو عاوز تعملى خاطر 
شيل عنى أحزان بالكوم
منتش شايف كدا وملاحظ
إنى شبعت حكم ومواعظ
خلاص مليت من دور الواعظ 
وحوار التبكيت واللوم
حبه تودينى وحبه تجيبنى
بلاش تعاتبنى تعالى حاسبنى
لو زهقان منى متسيبنى
متحطش ظلم فوق المظلوم
إيدك فى الميه وإيدى ف النار
وكل دقيقه نشرة أخبار
ويوماتى تلاتين إنذار
وتسمعنى كلام مسموم
قبل متكوينى بلسانك
أغمرنى مره بإحسانك 
تعالى مكانى وادينى مكانك
ونشوف تستحمل كام يوم