فيه ناس حلوين مقدرش انكر 
وناس دمها زى السكر
وناس تخافها بلاش تشوفها
لو شفتها دمك يتعكر
الناس أجناس أخلاق وطباع 
ناس أتباع وناس تتباع 
ناس هاديه وقلوبها صافيه 
وناس أشرس م الديب لو جاع
ناس تتمنى تديها عنيك
وناس تديها باللى فرجليك 
ناس بتشيلك ناس تديلك
ويحبوك ويخافوا عليك
ناس تتمنى تقرب منهم
وناس بتشوفهم تبعد عنهم
ناس بتردك ناس بتعضك
مهما عملت ياخويا عشانهم
نصيحه منى لو تختار 
رفيق هيعيش وياك فى الدار
شوف اللى يدلك ع الجنه
إوعى اللى يزقك فى النار
ميغركش شكل ولون
أبيض أسمر بس يكون 
عاقل والوش متفائل 
هيفيد بإيه حلو ومجنون
وابعد عن تقيل الدم 
واللى كلامه زى السم
شوف اللى يحبك وتحبه
واللى يشيل عنك الهم