قلمى مليته حبر أخضر
ووصيتو يكتب كلام معطر 
فجأه لقيته بيحكى حكايه 
بدايتها حلوه بس النهايه 
حبيب مشى من غير وداع 
وساب حبيبه مع الضياع 
القصه جميله والنهايه حزينه
ياريتها كانت فرح وزينه 
ليه تمللى نازل وطالع 
عمال تقلب فى المواجع 
إللى هاجر واللى مات 
واللى سافر من سكات
وليه تخلى البطل يموت
صحيه والفرح يملا البيوت
خليه يعيش ولو محصلش
لو مات حقيقى اسكت متقولش
الناس ياعم مش ناقصه غم
ولا حكايات تزيدها هم
قول انو سافر يومين وراجع
إبعدنا ساعه عن أى واقع 
قول انهم اتقابلوا تانى
وسط فرحه ونور وأغانى
هات القلم دا سيبو جنبى
وخدلك قلم فيه حبر بمبى
ويللا اكتب من جديد 
إحكى حكايه آخرها سعيد
ورينى كده كتبت إيه 
خلينى أحكم أنا عليه 
حبيب مشى من غير وداع 
وساب حبيبه مع الضياع