منا فينا 
الناس اللى سابوها 
لما سرقوها ونهبوها 
واللى خربوا بيت أبوها
دول جماعه منا فينا
إللى سهل واللى أتاح
واللى برطع فى البراح 
والبلطجيه بالسلاح
دول كمان منا فينا 
إللى ردم النهر وبنى
واللى قال دا ورث امنا 
واللى قعد على حقنا 
دول كمان منا فينا 
إللى أخد ملايين رشاوى
والهدايا والحشاوى
واللى جمع وكتب يساوى 
دول كمان منا فينا 
إللى لفوا وأخدوا جوله
واستغلوا نوم الدوله 
وأخدوا حكم بعد المداوله 
 دول كمان منا فينا 
إللى خبط واللى شفط
واللى شد الحبل وربط
واللى راح يزرع يفط 
دول كمان منا فينا
إللى مشفهمش حد
واللى قال هات وخد
واللى مضى وقعد يعد
دول كمان منا فينا 
إللى حوط وحط سور
واللى رمى شوية بذور
واللى قال للشعب غور
دول كمان منا فينا 
إللى سابوا الشعب نايم 
لما كان الجو غايم
وراحوا يجروا ع الغنايم
أخدوا ليهم اللى لينا 
منا فينا