هات ورقه واكتب عنوانى 
وخد رقمى أحسن تنسانى 
أنا ساكن فى مدينة الأحلام 
شارع التوهان حارة الأوهام 
رقم البيت أربع تصفار 
مبنى حوالينه اسوار 
وحجاره مرصوصه رص 
وسلالم بتنزل بس 
وشجره لسه منزرعتش 
وفانوس فيه شمعه مبتقيدش 
بينى وبين السكه مسافه 
تمشى خطوه يجيلها إضافه 
لما تجينى إقطع عوده 
يمكن متحسش بموده 
وانده ومحدش هيرد 
ودانى من الصمت بتنسد 
وكلامى مش آخر موضه 
وبكتب على جدران الأوضه 
أنا مش عارف أنا مين ومنين 
أنا إسم فى كشف التايهين