إنتهى الدرس 
واللى فاهم يرفع صباعه 
هسأل سؤال ويجاوب عليه
هوا الولد كان مهاجر ليه 
وليه ساب الوطن وباعه 
إيه اللى هناك ومهوش هنا 
ليه مش راضى يعيش زينا 
وليه بيغامر بالروح بتاعه 
مين غواه واتولى أمرو
مين خصملو نص عمرو 
مين كسر للمركب شراعه
سامعك بتقول إن الإجابه
إننا عايشين فى غابه 
والفساد فيها مستربع
والوحوش بتاكل وتشبع 
والباقى بيشكى ضياعه
الإجابه صح... وسقفوله 
قال اللى كلنا عاوزين نقوله
لكن بنفضل سماعه