كان ياما كان أيام زمان
يللا نسمع ونشوف كمان
إدينى بمليم حلبسه 
وامى بتقولك اتوصى
وهاتلى بنكله حلاوه وبيض
ووقية شاى وهات اللى يفيض
طلباتك إيه يامو شريفه 
هات رطلين لحمه بتعريفه
والنبى دا الغلا هيجيب الداغ
دا العجل وصل لتمانيه صاغ
عشنا وشفنا ياخاله عديله 
نص افرنك يروح فى الليله
ياخبر يا صميده هنعمل إيه 
فدان الأرض وصل لجنيه
عمنول كات لسا رخيصه 
قيراطين ببرنزه وكات هيصه
عمى بنى دار تلات تدوار
بتلاته جنيه وفيها الدوار
منك لله يا حكمدار
غليتها علينا وبقت نار
والنبى منا عارف أعمل إيه 
دا جهاز أمونه كلفنى جنيه
يعنى كان لازم تتفشخر
دا عريسها مكتبش مؤخر
إدعيلنا ياشيخ يابو العلا
ربنا يرفع عنا الغلا
أنا رأيى نشتكى للوالى
رفع الأسعار المتوالى
وانتى كمان ياختى يا إحسان
تشكى للست بتاعتو كمان
كان ياما كان أيام زمان
أدينا سمعنا وشفنا كمان