نحن البسطاء منغير وسطاء
مبنزعلشى م الباب للطاء
حلوين عايشين وياها ماشيين
ملناش لا فطور ولا فطحين 
ولا نعرف بابى ولا مامى
أكلنا حراق دمنا حامى
نمسح وشنا والفوطه كمنا
واللى يهمنا دار بتلمنا 
بقرتنا فبيتنا وجاموستنا
وأقل حاجه بتبسطنا
وان حاله مسكت أو فلتت
جبنه وبتاو ومشلتت
بطنا وزنا .. خيرنا وعزنا
تتهز الدنيا .. ولا تهزنا
لو يوم بالفرض الدنيا برد 
بنعيش بالطول أو بالعرض
بنحط لحافنا على اكتافنا
ووابور الجاز بيكيفنا
ونلم الليله كل العيله
ونقزقز ترمس وبليله
نقفل يا سكينه بابنا علينا
وعيالنا بتلعب حوالينا
ميه الميه الحاجه بهيه 
جايبالنا العشا ع الطبليه
بص اتفرج إوعى تهرج
دول ناس حساسه وبتُحرج
هتقولها زيد وللا عبيد
هتقول عشينا فول بالبيض
ناس منتشره تحب العشره
معدنها دهب ومهش قشره