حبيتك ولونك قاسى
وعوازلى حاسدنى عليك
تواعدنى وبتعمل ناسى 
وتملى العشاق حواليك
وأرجع وانا دمعى على خدى
وتقوللى غلطه وهتعدى
والفكر يجيبنى ويودى 
واسهر ليلى أفكر فيك
وامشى وانا وحدى حيرانه 
واسمع بيقولوا غيرانه
من حبك ياما شفت مهانه
تخاصمنى وعليا ارضيك
آه من حبك آه م الغيره
دا يوماتى خلانى فحيره
والقلب ملوش غيرك سيره
سهران ليلو مشغول بيك
عقلى يقولى كفايه انسيه
حبك هوا اللى مقسيه
وانا قلبى مين هيواسيه
مش متعود يوم يجافيك
إللى فاكرهم بيحبوك
على هجرى تملى يزقوك
بكرا يا حياتى هينسيوك
ترجع دمعك جوا عنيك
مش هستنى ولا هتمنى 
ولا أقول ع النار أبدا جنه
لو حتى فى إيديا الحنه
همشى واقول ربنا يهديك