إفرحى ياحارتنا لجارتنا 
ألفين مبروك على حبيبتنا
وتعالوا نهنى ونغنى
خلوا الأفراح تدخل بيتنا
دا عريس الهنا يامو لواحظ
وموظف ياختى وملاحظ
وبيقول الشعر يوقف شعر
فشر المتنبى والجاحظ
عقبال بنتك يامو زكيه
ونشوفها عروسه مجليه
إسم على مسمى النبى ياما
عقلها يوزن ألف وميه
قولوا للمأذون الكيل موزون
عروستنا تزين حرف النون
وعريسنا عاقل ويتاقل
بيقول تستاهل ميت مليون
قوموا اتحزموا يللا يابنات
وارقصوا غنولها سبع غنوات
قومى لفى يا نانى بصوانى
فرقى يللا واسقى الشربات