المريخ.. رايح جاى
وداعا يا صاحبي
على فين؟
ع المريخ
بجد؟
أعصابي إتحرقت.. مخي شاط.. والمذاكرة في الباى باى....
إيه الحكاية؟
صاحبنا يفتح الكتاب يسمع بأعلى صوت وكأنه تحذير من غارة جوية:
"الكلور يلى عايزه الكلور"
يقفل الشباك يسمع مكبر من نوع تانى:
"ع السكين يا بطيخ ..حَمّار وحلاة"
والصوت واصل واصل حتى لو عربية الكلور قلبت أو بتاع البطيخ مات.
ليه؟
الحي الشعبي والمناسبات عددها في اللمون.. والفرحة مستحيلة من غير مكبر صوت غليظ.. والحكومة ساكتة.. قالك أسافر
* يا صديقي هتذاكر إزاي لوحدك في المريخ؟
* مش مهم لوحدى المهم الهدوء.. الاسترخاء.. راحة الأعصاب.
* ومتلاقيش غير المريخ؟
* قريب وفيه كائنات مسالمة.
* جواب نهائي؟
* جواب نهائي.
وسافر المسكين.. ركب سفينة فضاء درجة ثالثة.. على قد فلوسة – واخد معاه كل الكتب والكشاكيل والملخصات.
أول ما حط رجله على سطح الكوكب العجيب، لقي كائن حي مش مخيف ولا حاجة بس غريب الشكل يشبه الريبوت لكن من لحم ودم وفى حجم الإنسان وطالع من رأسه "3 أريال" وفى صدره طقم زراير الوان.. المصري قالوا "سلامو عليكو" التانى مردش ولكن شاور على طقم الزراير كأنه بيقوله اختار اللغة.. قوام صاحبنا ضغط على زر منور اخضر مكتوب عليه(arabic) وعاد السلام من تانى:
* "سلامو عليكو"
* وعليكو انت عربى؟
* عربى مصرى
* أهلا بيك على سطح كوكبنا.
وبعد التعارف صاحبنا سأل الكائن المريخى عن اقرب حديقة هادية فقال له:
* شايف الجبل القريب ده؟
* شايفه.
* وراه على طول.
* الرجل الفضائي ضغط على زر (off) وراح لحال سبيلاه
الزميل وصل الحديقة.. جميلة هادية مفيش بعد كده هدوء.. بس فيها نباتات من نوع غريب.. صحيح اوراق خضرا ومساحات خضرا وزهور ملونه لكن الأشكال غير مألوفة.
"مش مهم..آدى قعدة"
كرسي انتيكة تفرد عليه ظهرك وتقول" يا سلالالام".. والقرص بتاع الكرسي مبطن بمادة إسفنجية طرية مريحة بشكل.
وبدأت المذاكرة .
الأخ فتح الكتاب ولسه بيقول"بسم الله الرحمن الرحيم" لقي الكائن المريخى إياه جاى ومعاه سبعين رجل فضائي من نفس النوع مع اختلاف الحجم وكل واحد ماسك ميكروفون.. وعملوا عليه دايرة وأديها أصوات رهيبة.. أصوات ملهاش معنى ولكن على هيئة هتافات.. الطالب المصري استنجد بالزعيم.. أبو زراير.. ضغط على زر (arabic)
ودار الكلام:
* شرفت كوكبنا يا مصرى.
* أرجوك أرجوك سكتهم.
مستحيل دي تحية الكوكب للضيوف.
* يعنى إيه؟
* 3 شهور احتفالية على الطريقة الفضائية.
* 3 شهور؟
* بالتوقيت المريخى
* مش فاهم؟
* يعنى 7 شهور بالتوقيت المصري
* يا انهار اسوح.
دا نظامنا في إكرام الضيف.. مش عندكو برضه إكرام الضيف؟
وعندها.........
الحوار شطب قوام قوام.. الواد لم كتبه واتشعبط فى أول سفية فضاء نازله للأرض.. ورجع من تانى حي الجمالية.
* مش قلت لك يا صاحبي البلد دي أحسن من غيرها.
* معاك حق
* خلاص هتذاكر تحت طلقات الميكروفونات المصرية؟
* هذاكر.. بس مش هسكت.
* هتعمل إيه؟
* هأسس جمعية أهلية مشهرة لمكافحة مكبرات الصوت.
* والله فكرة.. خدني معاك وهجبلك 1000 عضو معايا.
* ممكن نبدأ بأحياء القاهرة وبعدين تتعمم على مستوى الجمهورية.
* وممكن على مستوى المريخ.
*ما عدا الكلور والبطيخ!!
عدد زيارات الموقع
2,731,100
ساحة النقاش