( السرايا )
نظرة واحدة من عندكم
يا ساكني السرايا
روحوا وخليكوا بعندكم
واحنا ح نروح السرايا
****
رايحين بينا كده على فين ؟!
باخت قوي معاكوا الحكاية
خايف حتى ف يوم وانا ماشي
ألمح جنبي مكان ضلاية
وإن رجعت للشمس تاني
يدفعوني تمن درايا
روحوا وخليكوا بعندكم
واحنا ح نروح السرايا
****
خايف أنام وأصحى ألاقي
جاية عليا فاتورة نوم
خايف أطلع حتى ل بره
أرجع م الأسعار مكتوم
شفنا القهر على يدكم
راحة بال راحت مش جاية
روحوا وخليكوا بعندكم
واحنا ح نروح السرايا
*****
عم يا بيه
يافندي
يا ريس
ماشية الخلق خلاص بتهيس
باقي إيه ترازونا بيه
افتي يا بيه
اشجينا وميس
البيت بيتك ودي أرضكم
سوقوا فينا كمان بعصاية
روحوا وخليكوا بعندكم
واحنا ح نروح السرايا
*****
آه يا سنينا العجاف
طب سيبولنا لقمة حاف
استرونا ليوم مواتنا
قطعتوا ليه حتى اللحاف
شموا ع البلاج وردكم
وانا راح اشكي لرب سمايا
روحوا وخليكوا بعندكم
واحنا ح نروح السرايا
*****
صدقوني خايف أحكي
يافطة ع الشفاه ( ممنوع )
وإن حبيت لوحدي أبكي
ح ياخدوا ضريبة ع الدموع
واحنا فداكم فدا خدكم
لا كتابة نافعة ولا قراية
روحوا وخليكوا بعندكم
واحنا ح نروح السرايا
*****
غلبت أشكي
للبيه حالي
يضحك بعيونه: وانا مالي
لو بتحسوا طيبتنا يا ب ش ر
ف عيون احنا بنخبيكم
ارضوا بس انتم بالقدر
وسيبونا واحنا ح نربيكم
زيدوا كمان سنوا ف حدكم
خلوا ضريبة ع الضحكاية
روحوا وخليكوا بعندكم
واحنا ح نروح السرايا
*****
هي دي عيشة؟ والله عيبة
زودوا ع الأحمال بزكيبة
صار الموت ف زمانكم أرحم
ضحكوا وقالوا : عليه ضريبة
طب إيه أخرتها إيه قصدكم
امتى للأوجاع دي نهاية
روحوا وخليكوا بعندكم
واحنا ح نروح السرايا
#عصام_فؤاد
