مجرد صوره*
*وكل حاجة فيك
بقت صوره
من برا ما شاء الله
ومن جوه مكسوره
مجرد لقطه منشوره
حكاية طويلة يبهرك جزء
وباقي اجزاءها مبتوره
وناس تضحك علينا بزيف
وناس تطلع علينا بسيف
وناس بتبان لنا مبهوره
وناس حيتان واكله المشهد
وناس صبيان
من فقرها مقهوره
واعلام له زمن بيصور
ولما تدور
تلاقي الشاشه مكسوره
والكاميرا بتصور
في كون غير الكون
المصور معذور
والكاميرا مأموره
والصورة
لازم تطلع في الخيال
لأن الواقع حكاية مأسوره
مابين رشاش
وقبضان حديد
وقاضي بيطلب التجديد
وياما وعود وياما وعيد
والحفله حلوه ميسوره
صور خد اللقطه
وخلي الحلوه أموره
لكن اوعى
في يوم تخدعك
صوره بتقابلك بالحضن
لكن بتودعك
بص في عنيها
يمكن تفهمها
ويمكن تسمعك
يمكن تسمعك
ناصر توفيق
