مسحراتي
مجاني خالص
أصل الحكاية ناشفة يا ابني
لا فيها كحكه ولا بسكوتايه
التمر هندي
بليت بداله فول حراتي
وأختي الكنافه
أجيب لها سكر منين
وحدوووووه يا مؤمنين
ربك يسامحها مراتي
ماسكة المصاريف
واستكترت علينا يا ابني العدس الجريف
عيني عليه واقف لوحده ف الصف الرغيف
وافطر يا صايم
على ايه يا أم هاشم
مدد يا حسين
يا عدره نظره
دا احنا برضو ف الأوله والآخره
شجره
رمضان يا تمره
إبليس بيلعب معانا يا ابني حراميه غفره
فين الفاروق
يغرف من على النار الحصى ويدوق
رحت فين يا عدل وانت فين يا زوق
الصوت خفس ف الطبلة مزنوق
هوه اللي يشم ريحة الكباب فاطر
والا اللي يحقن نفسه بالصبر يطعم ألفين حزين
افطر يا يا صايم
مين اللي قال ابليس
هناك محبوس
هوه حد بيطفي فيه السجاير
والا الملايكه بتاخدوا كعب داير
رمضان بلاش
تلف وجعي بمكركون وشاش
صيامي السنادي
نقلوه على حسابي للانعاش
**
أحمد طرشان/ مصر
