وسط زحمة الحياة
إعتكفت أنا جوه منى
نفسى ألقى طوق نجاة
ينتشلنى ويحتضنى
ويحسسنى بالحياة
مجتمع ما هوش مثالى
بس عامل فيها شيخ
عيب وما يصحش تعالى
عايزة ليكى بصمة كيف؟
هس بس إنتى أنثى
ماتملكى م الأمر شئ
كان زمان وأد البنات
يدفنوها يقولوا عار
والنهاردة وأد فكرة
أصل مكانك جوه دار
مجتمعكوا بفكره غار
مش هاعيش أنا جوه
طوقكم
هاكسر القيود وأفوقكم
مش هاكون رهن إشارتكم
رافضة أعيش جوه حيازتكم
ليا فى الدنيا كيااااااان
مش بكيفكم غصب عنكم
أنا القوة أنا الجبروت
ومش خايفة بإيدكوا أموت
بإيدى أنهى عرش ملوك
وبإشارة تكون صعلوك
ولو هاحكم تكون مملوك
ما تملك م الزمام أمرك
أنا حوا وأنا مريم
أنا ذليخة وأنا بلقيس
أنا خديجة معاها إيزيس
وإنتوا نسلكوا منى
ما تنكرونيش
ما تستهونش بإرادتى
ده من غيرى ما يحلا
العيش
أنا الكلمة اللى تجمعكوا
أنا الحضن اللى لاممكوا
أنا الضحكة اللى تسعدكوا
أنا الحنية وقت الضيقة
لقلوبكوا
أنا النظرة اللى تسحركوا
أنا نعمة من الرحمن
سيبونى أعيش وأتنفس
أنا الأنثى أنا الإنسان
