عزيزى الوزير – عزيزى المسئول هل تعلم ؟
كل يوم بنقرا ونسمع لمعاليكم تصريحات استفزازية تنزل على مخ الانسان زى ما يكون جبل المقطم وقع فوقه ليه مش عارفه
طبعا واكيد لولا الثورة من البداية ما كنتش سيادتك شوفت الوزارة لانه اكيد ما كنتش من حظوة و صفوة عصر مبارك
عارف سيادتك ثمن الكرسى و المكتب الفخم بتاعك ايه تعالى نحسبها من 25 يناير الى الان
يا ترى كام واحد مات حسبتهوم
و يا ترى لو ترجمنا اللى ماتو دول لعدد لترات من الدم يا ترى يطلعو كام لتر دم كثير قوى صح يعملولك بحيرة دماء تعوم فيها مرتاح
كام واحد معاق من المصابين اعاقات مختلفة ما بين فقد عيون وارجل واعضاء و و و حسبتوهم
يا ترى فى كام طفل يتيم فقد ابوه او امه و اسر فقدت عائلها عملتلهوم احصائية
كلام الدم بيوجع خلينا بقا فى الرفاهية
عارفين فى البوليكا بتاعت الثورة دى خسرنا قد ايه من اثار مصر تعالو نحسبها
كام اثر اتسرق واتهرب بسبب الانفلات الامنى
كام كتاب اتحرق و لا داب من الميه فى حريق المجمع العلمى
فى ناس هتقول ايه يعنى كتاب متوقع فى عالم الجهل و التخلف
لانه وبساطة الكتاب حصيلة حياة عالم احسن منى ومنك و من الف زينا قضى حياته فى علم ودراسة علشان يسيب علم ينفع الناس روحنا بكل حقارة حرقنا الكتاب وحرقنا عمر و حياة العالم معاه .... حرقنا كام عالم فى المجمع عارفين اكيد لا
متحف الاثار الاسلامية يساوى كام فى نظركم اثار العصر الاسلامى اللى ملا الدنيا علم وحضارة ونور اتدمر بادينا
وما حدش يقولى خايفة على الطوب اكثر من البشر لانه اللى عمل الاثار دى و الكتب دى كانو اشرف البشر
احسبو حضراتكم كل لتر دم يسوى كام وكل واحد مات عمره وتعب اهله فى تربيته بكام و ثمن كل اثر كام يطلع ده ثمن الكرسى اللى كثير من الناس اترزعو عليه علشان يستخفوا بعباد الله
بلاش تعملوا للبلد مش مهم لانكم مش هتعملوا ممكن تحترموا عقولنا شوية تحطوا لسنتكم فى بوقكم وتريحونا بقا
