طبعا استحالة إن رمضان يعدي من غير القطايف..
وعلى فكرة ممكن إنك تعملي أقراص القطايف في البيت أو إنك تشتريها جاهزة من بره.
 

طريقة عمل أقراص القطايف

المقادير:

• معلقة كبيرة سكر.
• 1/2 كوب حليب دافئ.
• معلقة صغيرة خميرة.
• معلقة صغيرة بيكنج باودر.
• كوب وربع دقيق.
• كوب ماء.

الطريقة:

دوبي السكر مع اللبن الحليب وضيفي إليهم الخميرة وسيبيهم لمدة ربع ساعة لغاية ما الخميرة تبدأ في التفاعل.

اخلطي البيكنج باودر مع الدقيق وضيفي إليهم الخليط السابق والميه وقلبيهم كويس لغاية ما تلاقي المكونات دي كلها اندمجت مع بعضها وسيبيهم لمدة ربع ساعة.

سخني المقلاة كويس "ويفضل أن تكون من الحديد سميك القعر لتحمل الحرارة العالية" وصبي فيها مقدار معلقة كبيرة من المزيج وكرري نفس الطريقة علشان تحصلي على أقراص القطايف. وخدي بالك إن أقراص القطايف بتحمر من ناحية واحدة فقط. وكمان عند وضع الخليط في المقلاة تظهر فقاقيع داخل القرص ده دليل على نجاح عملية التخمر..

دي كانت طريقة عمل أقراص القطايف نشوف بقى طريقة عمل القطايف بالمكسرات..
 

قطايف بالمكسرات

المقادير:

• أقراص قطايف على حسب ما إنتِ عايزة.
• كوباية بندق مجروش.
• كوباية لوز مجروش.
• كوباية سوداني مجروش.
• 1/2 كوب سكر.
• 1 معلقة كبيرة ماء زهر أو ماء ورد.
• زيت للقلي.
• شربات.

الطريقة:

هاتي طبق واخلطي فيه البندق واللوز والسكر وضيفي إليهم ماء الزهر أو الورد.
بعد كده هاتي القطايف واحشيها معلقة كبيرة من الخليط ده بس خدي بالك إن الحشو ده يكون في وسط قرص القطايف واقفلي قرص القطايف بالضغط عليه بإديكِ، وخدي بالك إنك تتأكدي من عدم وجود أي حشو ظاهر.

بعد ما تخلصي حشو القطايف كلها هاتي صينية وسخني فيها الزيت كويس وبعد كده اقلي القطايف على درجة حرارة متوسطة لغاية ما تلاقي لون القطايف بقى دهبي وشيليها من الزيت وحطيها في الشربات، وبعد كده تطلعيها من الشربات وحطيها في مصفاة علشان تتخلصي من الشربات الزيادة. بعد كده حطيها في طبق الحلويات وبالهنا والشفا.

ودي كمان طريقة عمل شربات القطايف..
 

مقادير الشربات:

• 1/2 كوب سكر.
• 3/4 كوب مية.
• عصير ليمونة.
• فانيليا.

طريقة عمل الشربات:

حطي السكر والمية كلهم مع بعض في إناء على نار هادئة لمدة ربع ساعة.
بعد كده ضيفي الليمون وسيبيه لمدة 5 دقائق لغاية ما يغلي بعد كده حطي الفانيليا وشيليه من على النار وسيبيه لغاية ما يبرد.

بس كده خلاص..

ده الفطار بتاع النهارده، لو عجبك ابعتي وقولي لنا..

وكمان لو عندك فكرة لطبق رمضان ممكن إننا نعمله في رمضان ابعتي وقولي لنا عليه
واحنا هننشره باسمك على طول..