كان يا مكان في قديم الزمان ارض مستعمرة بفرنسيس مستوطنة، قتلت اصحاب الارض و نهبت ممتلكاتهم لقرون، قاوموا وقت طويل حتى قدروا يجيبوا الحرية و يسترجعوا الكرامة، رغم ما قيل ان فرنسا كرهت منهم و اعطاتهم الاستقلال، بعد المعاناة الطويلة تع الاباء و الاجداد، جاء وقت الكراسي... من ياخذ الكرسي الكبير تع البلاد و يبقى عليه للابد، المناضلين و المجاهدين لي ضحاو بالدماء و الابناء و بكل ما يمكلون من نفس و نفيس، بقاو في حيرة شكون لي رايح يسير البلاد شكون يكون رايس على البلاد و العباد. كان واحد الشاطر عرف كيف يدخل مليح رجليه و ما يخلي مجال لغيره دخل بقوة الحديد، لكن عارف روحو بلي ماشي معروف و بالتالي ماشي محبوب عند الجزائريين، بالصح كان فايق و لقى الراجل لي يمكن يقبلوه الشعب عرض عليه لكن الراجل ما قبلش بالصح صاحبوا لي كان معاه في سجن فرنسا منذ 56 بعد حادثة اختطاف الطائرة، قال هذه فرصة من الكبار راح يكتب برية لقيادة الاركان باش يقوللهم راني هنا... فكروا فكروا قالوا ما يلقي غير هذا لامرين اولا معروف عند الشعب و زيد راه عندو اللهفة على الحكم مادام ملهوف على الحكم واش نقولولو رايح يدير  غير باش يبقى في الكرسي.  جاء هذا السيد كل يوم يدير حركة غريبة تبين بلي الراجل بدى يحس بالسلطة والقوة و النفوذ، بالصح جا النهار لي خلاصو دراهموا و القاز طلع للراس، هذا النهار لما عول على العزيز الحالي وحب يحاوزو من الوزارة، كي سمع الاسد الكبير بالحكاية جا يجري من الخارج و قلب عليه الحكم و حاوزو من الرئاسة و عله في اقامة جبرية لسنوات طويلة ....دار الزمان و اصبح الوزير سلطان ، و في عهد السلطان-الوزير مات الرئيس القديم للبلاد ، بالصح السلطان كان وليد اصل و اقام الحداد لمدة ثمان ايام... اللغز يا شطار علاش ثمان ايام ؟