الكيك بيبوظ منك مع ان الوصفة هايلة تعاليلى يا حلوة

من 12 سنة زى النهاردة
كانت السماء بتبرق وترعد
اخدت وصفة كيك وعملتها لاول مرة بس بقى اللى اهم من الوصفات لان فى وصفات كتيرة كويسة وبتطلع مظبوتة فى حاجات لو انتبهنالها هتطلع الكيك رائع كل مرة
1 اول ما تبداى فى الكيك تشغلى الفرن يسخن
2 تبطنى الصينية بزيت او سمن ودقيق لو الكيك ابيض يعنى لبن او برتقال بس لو كيك شيكولاتة بطنى الصينية بزيت او سمن وكاكاو
3 وانتى بتضربى العجين خلى تقليبك فى اتجاه واحد علشان الهواء مش يخرج وتطلع عالية وهشة
4 بعد ما تحطى مقدار البيض اللى عندك حطى على العجين 1/2فنجان صغير مية بتغلى العجين هيتعامل معاها زى البيض وتساعد على ارتفاعه
5 الفانيليا بعد البيض فى الاخر خالص علشان لو اتضربت كتير بتمرر فى الطعم
6 لو هتحطى مكسرات او زبيب غلفيهم بدقيق بس من نفس المقدار اللى عندك فى الوصفة
7 بعد ما تخلصيها مباشرة حطيها فى الفرن السخن
8 اول نصف ساعة داخل الفرن مش تفتحى عليها الباب لاى سبب علشان بتبقى لسة فى مرحلة الارتفاع فمش ينفع تطلعى الهواء السخن من الفرن بفتح الباب
9 بعد اول نصف ساعة لو حبيتى تفتحى الباب تختبرى درجة السوى مش تقفلى الباب جامد علشان مش تعرضيها لضغط الهواء فتهبط
10 لما بتستوى بتنفصل الكيك عن الصينية وتقدرى تشوفى ده بعينيك عادى وعلشان تضمنى السوى اغرزى سكينة فى الوسط لو طلعت ناشفة يبقى ok
11 لما تطلعيها من الفرن مش تحطيها فى مكان فيه تيا هواء علشان مش تهبط
12 سيبيها 10 دقائق وخرجيها من الصينية لانك لو حاولتى تخرجيها وهى سخنة اوى هتفرط منك
13 يفضل تسيبيها مش اقل من ساعة علشان تقطعيها بالشكل اللى انتى عاوزاه برضه علشان مش تتكسر منك

14 كليها بالهنا والشفا

15 عاوزة تقييم جامد لانى كتبت الموضوع ده مرتين اول مرة النت فصل وانا باعتمده بس برضه علشان ضميرى لسه فاضل عليه شويتتن قبل ما يموت قررت اكتبهلكم تانى لانى مقتنعة ان الاشياء البسيطة دى مهمة جدا لنحاح الكيك بتاعك اهم من الوصفة نفسها
باى