يعنى ايه القائمة الفردية .؟ ويعنى ايه نظام القائمة النسبيه؟ وازاى هتتحدد نتيجه الانتخابات ؟
شرح ...بسيط
...........................................

بالنسبة للنظام الفردي اسلوب تحديد النتيجة هو نظام الأغلبية المطلقة يعني اللي يحصل على اغلبية اصوات الناخبين الصحيحة بـ 50% + 1 يكون هو المرشح الفائز أما لو محدش حصل على النسبة دي لازم نعيد الانتخابات بين الاثنين اللي حصلوا على أعلى الأصوات

أما في نظام القائمة النسبية المغلقة اسلوب تحديد النتيجة هو نظام التمثيل النسبي
وفي النظام ده كل قائمة بتحصل على عدد من المقاعد المخصصة للدائرة الانتخابية حسب نسبة الأصوات الصحيحة اللي حصلت عليها في الانتخابات
فلو فرضنا ان فيه دائرة انتخابية فيها 10 مقاعد بتتنافس عليها 3 قوائم وكانت النتيجة :
القائمة (أ) حصلت على 60 % من الأصوات فلها 6 مقاعد
القائمة (ب) حصلت على 20%من الأصوات فلها 2مقعدالقائمة (ج) حصلت على 20%من الأصوات فلها 2مقعد

بس الواقع العملي مش بالسهولة دي يعني ممكن بعد التوزيع الأولي يكون فيه مقاعد متوزعتش وأصوات مستفدناش منها طب ازاي بتتوزع البواقي ؟

تعالى الأول نتعرف على حاجة مهمة اسمها المعامل الانتخابي 
المعامل الانتخابي يعني تقسيم مجموع الأصوات على عدد المقاعد اللي في الدايرة وحاصل القسمة هو ده اسمه المعامل الانتخابي مثلاً 
لو عدد الأصوات الصحيحة في الدائرة = 300.000 صوت
وعدد المقاعد في نفس الدائرة = 6 مقاعد 
هنقسم 300.000 ÷ 6 = المعامل الإنتخابي اللي هو 50.000

نضرب مثال 
لو فيه دائرة انتخابية فيها 5 مقاعد و4 قوائم حصلوا على 200.000 صوت موزعة كالأتي 
القائمة (أ) حصلت على 85000 صوت 
القائمة (ب) حصلت على 60000 صوت
القائمة (ج) حصلت على 30000 صوت
القائمة (د) حصلت على 25000 صوت

ازاي هتتوزع الـ 5 مقاعد على الـ 4 قوائم ؟
تعالوا نطلع المعامل الانتخابي
عدد الأصوات 200.000 صوت ÷ 5 مقاعد = المعامل الانتخابي اللي هو 40.000 صوت

فهيكون التوزيع كالتالي

القائمة (أ) 85000 صوت ÷ 40.000 = 2 مقعد والباقي 5000 صوت
القائمة (ب) 60000 صوت ÷ 40.000 = 1 مقعد والباقي 20.000 صوت
القائمة (ج) 30000 صوت ÷ 40.000 = لامقعد والباقي 30000 صوت
القائمة (د) 25000 صوت ÷ 40.000 = لامقعد والباقي 25000 صوت

وهنا هنلاقي ان التوزيع الأولي حسم 3 مقاعد
والباقي 2 مقعد هيتوزعوا على القائمة اللي عندها أقوى باقي أصوات
يعني القائمة (ج) عندها أقوى باقي هتاخد مقعد
والقائمة (د) عندها ثاني أقوى باقي هتاخد مقعد 
فتكون النتيجة 
القائمة (أ) 2 مقعد ، القائمة (ب) 1 مقعد ، 
القائمة (ج) 1 مقعد ، القائمة (د) 1 مقعد