<!--
<!--[if gte mso 10]> <style> /* Style Definitions */ table.MsoNormalTable {mso-style-name:"جدول عادي"; mso-tstyle-rowband-size:0; mso-tstyle-colband-size:0; mso-style-noshow:yes; mso-style-parent:""; mso-padding-alt:0in 5.4pt 0in 5.4pt; mso-para-margin:0in; mso-para-margin-bottom:.0001pt; mso-pagination:widow-orphan; font-size:10.0pt; font-family:"Times New Roman";} </style> <![endif]-->
الله يحنن !
كان فيه راجل شحات غلبان
هفتان ونحيف
قاعد يشحت على طرف رصيف
بيغير ريقه بطعمياية
وعود جرجير على نص رغيف
عدى عليه بالصدفة خواجة
كان جاى يعرف أحوال الريف
الشحات شافه رسم على وشه
ملامح العوزة وقالها فى سره
يا فرج الله
وبصوته المخنوق المتحشرج
مد له إيده وقال : لله
ولأن التانى خواجة مالوش
فى العربى مؤكد مافهمهوش
والشحات علشان حظه منيل
فقرى ،طلع نقبه على فاشوش !
**
ورجع أمريكا صاحبنا وراح
سفارتنا وفيها سأل مسئول
عن كلمة لله اللى سمعها
ضحك وشرح له بكل بساطة ان دا شحات
غلبان متدارى ف هلاهيله
وبيطلب منه مساعدة مالية
مقابل إنه هايدعى له
وصاحبنا قدر من جوحل إيرت
يحدد له مكان الشحات
إياه وبكامل تفاصيله
وبنبرة رقيقة ودودة قوى
قال للمسئول
ممكن من فضلك لو تتكرم
تبعت دول
للشخص المذكور ؟
خدهم منه أصابه ذهول
شحات يتحصل م الدولارات
الأمريكانية على مليون ؟!
جاوب على نقسه وقال لأ طبعا بالتأكيد
وكفاية عليه المليون مش دولارات
لكن جنيهات
والدنيا اتقلبت بعد ما بدأت الاتصالات
ترى رن ترى رن
يا محافظ وصل هذا المبلغ للمذكور
ترى رن ترى رن
يا سكرتير عام قيه ميت ألف لراجل شحات
مطلوب يوصلوا فى الحال
ترى رن ترى رن
يا مدير الأمن العشرين ألف جنيه دول جايين
للشحات يوصلوا مفهوم ؟ !
ترى رن ترى رن
اوعى يا مأمور المركز تتأخر وادينى تمام
بوصول الألف جنية للمذكور قبل نهاية اليوم
ترى رن ترى رن
تليفون العمدة يرن يا عمدة
توصل للشاحت مية وخمسين
والعمده يناول شيخ غفر الناحية الخمسين
اللى بدوره ينادى على غفيره ويديله الحتة بخمسة
ارمح يا غفير واقف لسة ؟!
وصل للشحات خمسة جنيه
ويادوب هى مسافة السكة يقول للشحات
انت يا شحات اللى طلبت الحسنة من شخص
خواجة ووقفته وقلت له لله ؟
الشحات اتلخبط حاله
بعد ما مخه جابه ووداه
أنا معملتش غير كدا يا غفير
يسمع منه ويضحك ويقول له بكل هدوء
الأمر بسيط خالص يا على الله ،
مافيش أيها حاجة ، اطمن
وهاقول لك من غير ما تخمن
الراجل باعت يتأسف لك
