جارى التحميل
استخدم زر ESC أو رجوع للعودة
( عيدٌ بأية حال عدت يا عيدُ ؟ )
سؤال سألناه كتير ومازلنا بنعيده
لكن بنسأل وبرضه العيد ما بيردش
لحد ما القلب خنقُه كُتر تنهيدُه !
****
عاد واحنا أحوالنا زى ما هى بل ساءت
والخنقة رغم انتظارنا للفرج ضاقت
وجميع محاولاتنا للإصلاح خلاص باءت
بفشل ذريع والمعقد زاد فى تعقيده !
****
قالوا مسيرها هاتفرج قلت بس ازاى
واللى احنا فيه نيلة والأنيل كمان الجاى
واللى انحرف بعد ما قال للشرف باى باى
شاف خلق ياما بتتسابق فى تأييده !
****
من فين ما رُحنا الفساد دايما محاصرنا
والهمّ لابِدْ لنا والفقر عاصرنا
ومين هايعطف علينا أو يناصرنا
ربك يجازى بقى اللى أمرنا ف إيده !
****
العيد ماهوش لعبة صينى ولا بالّونة
ولا هو تعاليق وحبلين نور فى بالكونة
العيد هاييجى إذا شُفنا اللى ذلّونا
بيقلّوا حوالينا بعد ما كانوا بيزيدوا !
****
عيدنا الحقيقى هاييجى بس على مهلُه
لأن حالنا منيّل واحنا نستاهله
لو نخلص النية ، بكره - وانت من أهله -
نصبح على خير ننول كل اللى بنريدُه !
****
المسئولين عنّا بيزيدوا فى تعقيدنا
ومافيش لهم أى رغبة فى حاجة بتفيدنا
ومش باقيلنا سواك يارب تنجدنا
وتفك قيدنا وتمحى الظلم وتبيدُه !
2005 م
<!--
