لسةالأوضاع زى ما هىّ
لا عدالة ، لا عيش ولا حرية
وكأن الثورة المصرية
( ثورة مع إيقاف التنفيذ ) !
**
لسة مبارك هو الحاكم
ومصايب مصر بتتراكم
ومازال أمن ( العادلى ) الكاتم
أنفاسنا بيزداد تعزيز !
**
لسة التليفزيون ، كاميراته
متثبتة ع المنظر ذاته
للنيل ، ومازالت نشراته
نفس النشرات والمواجيز !
**
لسة بإيدها المتوضيّة
وتمسُّكها بالشفافية
بتسوقنا حكومات فلولية
وكأننا خرفان ومعيز !
**
لسة الجيش طالق (توفيقُه)
ع الثوار بفنون تلفيقُه
والهدف المطلوب تحقيقُه
هو رجوع حُكم العواجيز!
**
لسة المطحون بيزيد طحنُه
والأزمات بتزود شحنُه
بعد الفول ما هرب من صحنُه
وملا صحون غيره البهاريز !
**
لسة الثوار من زنازينهم
بيطالبوا الناس الحاجزينهم
مساواتهم بالمخلوع (زينهم)
وعصابته من غير تمييز !
**
لسة ولسة ولسة ولسة
والناس عارفة وشايفة وحاسة
بإيدين ( القلة المندسة )
اللى بتدّارى فى دهاليز!
**
لسة الفجر ماحانش أدانه
والثاير ما فارقش ميدانه
ويناير بكرة اللى أدانه
مش هايكون على مصر (عزيز) !
**
بكرة الدنيا تشوف ضحكتنا
ويبان لها إعجاز ثورتنا
عمر القهر ما هيموتنا
ولا كل صنوف التعجيز !
يناير 2012 م
