ملايين خمـسة ونص دولار
إتباع بيها منديل ثومة
دا كلام بتذيعه الأخبار
لا هزار ولا أفكار مـسمومة
ولا فيه رفض ولا استنكار
ولا تعبير عن أى خصومة
ولا فيه تقليل من مقدار
فنانة مصر المرحومة
ثومة هرم رابع ومنار
ثومة قضية خلاص محـسومة
بس اللافت للأنظار
هو وجود مناديل مظلومة
مثلاً منديل ست الدار
وبهانة وفلة وفطومة
والشقيانة ليل ونهار
بياعة الجرجير هنومة
منديلها المتعاص بعفار
وعرق ودموع مش مفهومة
منديل ييجي تلات امتار
ومفيش فيه رقة ولا نعومة
كان بيلم غدا الأنفار
ويشيل رز يكفي عزومة
ويحوش عنها صهد النار
ويدفيها وقت النومة
منديل له لون الصبار
وبراح الآه المكتومة
وياعينى طاويه الاستهتار
وضاربها الفقر بميت شومة
وعشـان نختصر المشوار
ونجيب م الآخـر يا حكومة
مش طالب غير بس قرار
بمزاد على منديل هنومة !!
2000 م
