باحب الحكومة !

باحب الحكومة  باحب الحكومة

واحب اللى بيقول باحب الحكومة

واحب اللى بتقول باحبُّه الحكومة

واصلى إذا حان أدان الحكومة

واصوم لما بيبان هلال الحكومة

ومابكلش إلا فراخ الحكومة

واحب الهزار مهما باخ م الحكومة

وباستطعم الفول بتاع الحكومة

مع رغيف بيتباع فى فرن الحكومة

ولما بنلعب فى جرن الحكومة

باروح استحمى فى نيل الحكومة

وطول عمرى ماسك فى ديل الحكومة

وماشى عدل جنب حيط الحكومة

بادور سواقى فى غيط الحكومة

وعامل عبيط لجل ترضى الحكومة

حويط بس باضعف قصاد الحكومة

لسانى سليط بس مش ع الحكومة

وأملى الوحيد فى الحياة هو إنى

أشوف نفسى (جلعاد شاليط) الحكومة !

ديسمبر 2010 م