جارى التحميل
استخدم زر ESC أو رجوع للعودة
خمسة وعشرين يناير
بعزيمة ودم فاير
رجعت معاه بشاير
مصر بتاعة زمان !
**
عمالها و فلاحينها
كُتّابها و فنانينها
المغروسين فى طينها
اتقابلوا فى الميدان !
**
لقمتهم الهنيّة
كانت بتكفى ميّة
وبحب وصدق نيّة
نُبْلهم المصرى بان
**
و"محمد" لما عازت
تجامله ، بحبه فازت
واتوضى من قزازة
"مريم" قبل الأدان !
**
والشيخ إمام بصوته
الحىّ برغم موته
من بعد ما طال سكوته
جلجل فى المهرجان
**
وعلم مصر اللى زيّن
خدود أطفالنا بيّن
تحقيق الحلم هيّن
وخلاص آن له الأوان !
**
الثورة فاتحة بابها
لشُيّابها وشبابها
علشان يكُونوا جبهة
ضد الخوف والهوان
**
فى ميدان تحريرنا صورة
واضحة وصادقة ووقورة
وزحمة بدون خطورة
ولا تحرش جبان
**
فى ميدان تحريرنا عيلة
مشاكلها مش قليلة
زوّد ميلتها ميلة
حكومة وبرلمان
**
مش جايين باختيارها
وخانقين نور نهارها
خرجت تاخد بتارها
م الظالم واللى خان
**
فى ميدان تحريرنا أمة
قايمة تزيح عنها غمة
و"المصريين أهمّا"
غنوة تزيدهم إيمان
**
فى ميدان تحريرنا واحة
للتنوير والسماحة
فيها شعار الصراحة
له صولة وصولجان
**
فى ميدان تحريرنا ثورة
سلمية بدون مناورة
نظرية المؤامرة
ملهاش جواه مكان
**
فى ميدان تحريرنا غابة
مزروعة ناس غلابة
بس حساب الديابة
بالإصرار وقته حان !
**
ومع صلابة عيدانّا
وجرس حاضن أدانّا
احنا مازلنا ف ميدانّا
وهُمّا فى الليمان !
**
دم الشهدا اللى ضحّوا
بالروح والدم صحّوا
نبْت الشموخ ونحّوا
عن طين مصر الديدان
**
أصل مافيش حد غيرنا
يقدر يصنع مصيرنا
ولا يرسم خط سيرنا
ويحسّسنا بأمان !
فبراير 2011 م
