بما ان مفيش فايدة ومفيش أمل‮.. ‬وكل حاجة زي ما هيٌه‮.. ‬الأسعار عمالة تزيد والناس كلها جاعت وباعت هدومها ولا زال الامن مستتبا‮!!.. ‬يبقي مفيش‮ ‬غير ان كل واحد يشوفله حل مع نفسه بس‮ ‬غير السلف والشحاتة‮.. ‬لان مابقاش في حد تستلف منه والناس كلها بتشحت‮!‬ الحل الوحيد هو انك تشد الحزام وترقص‮ .. ‬قصدي يعني تعملك كوباية شاي فتلة وتجيب معاك ورقة وقلم وتقعد وتستربع ع الارض وتحسب مرتبك بالعلاوات والزيادات يبقي كام وبيصفصف بعد الضرايب والخصومات علي كام وشوف احتياجاتك الضرورية اوي اوي اوي اوي جدا خالص‮!.. ‬وتستغني خالص عن الكماليات والمهرجانات والحبشتكانات‮.. ‬وتحاسب علي كل جنيه وتمسك فيه بايدك وسنانك لان بكرة اسود من النهاردة والجنيه الاسود ينفع في اليوم الاسود منه‮.. ‬ولا اخفي عليك سرا ان الافلاس هو رمز من رموز الالفية القادمة وشعار المرحلة الجديدة‮.. ‬اوعي تتنرفز ولا تتعقد دي الحكاية سهلة خالص كل اللي عليك انك تلغي شوية حاجات من اللي كنت متعود تشتريها ايام العز والفخفخة وتعود نفسك علي عيشة الفقر والضنك وتحتذي حذو اخوانك البؤساء‮!‬ ده طبعا عشان تعيش مستور وما تحتاجش لحد ولا تمد ايدك لحد ولا تهزأ نفسك‮.. ‬اكتر من كده‮!‬ والحكاية سهلة وبسيطة بس عاوزة شوية صبر علي حبة تنظيم وتدبيق في المصاريف وكل حاجة ح تبقي فل الفل وتمام التمام‮.. ‬يعني هو انت بتصرف فلوسك في ايه‮ ‬غير الاساسيات والضروريات زي الاكل واللبس والعلاج والمواصلات والتعليم والتليفونات والخدمات المشمولة بالضرائب والدمغات‮!‬ لانه مفهوم طبعا انك بعد ما اتجوزت وخلفت استغنيت تماما عن حاجة اسمها كماليات زي الخروج او الفسح او المصايف‮ .. ‬وما بقتش تقدر تستغني عن الحبسة والخنقة والنكد‮ ‬اليومي اللي بقا يجري ف دمك‮!‬ اما عن طريق التكيف مع المرحلة الافلاسية الجديدة ف اول هم هو التنظيم والتقنين في بند المأكولات والمشروبات وباستخدام المصطلح العلمي الدقيق يبقي‮ '‬ترويض وتجويع النفس البشرية‮'‬ - يعني لابد من الاستغناء تماما عن حاجة اسمها فراخ ولحمة وسمك ولو كنت م اللي يوعوا علي حاجة اسمها بط ووز وحمام وجمبري‮.. ‬يبقي تنساها خالص‮.. ‬وبعد ما كلت اللحمة الحميري والحواوشي الكلابي ح يبقي عادي جدا انك تتأقلم وتكتفي بأكل الزفر مرة كل شهر واللي مش ح تزيد بأي حال من الاحوال عن شوربة العضم المخلية وهي احسن من مفيش‮!‬ - تاني هم لازم تنسي تماما ان في حاجة اسمها خضار بأنواعه‮.. ‬ده الكيلو بقي بالشيء الفلاني دلوقتي‮.. ‬وكله كوم وطبق السلطة كوم تاني‮.. ‬لا لا سيب الحاجات للناس الهاااي لايف اللي بيقبضوا بالدولار واليورو‮!‬ - تالت هم اوعي تضعف ولا عينك تزوغ‮ ‬علي كيلو موز ولا بطيخة من ام عشرة جنيه‮.. ‬إحنا قلنا ايه‮.. ‬علي قد مهيتك مد رجليك‮!‬ - رابع هم اوعي عقلك يوزك وتفكر تدخل عند البقال اللي علي ناصية شارعكوا لحسن يدبسك في تمن جبنه اسطنبولي ولا بيض ولا سمنة ولا مكرونة ولا حاجة من الحاجات الوحشة دي‮.. ‬لا لا الكلام ده كان زمان‮!‬ - اما لو كان عندك عيال صغيرين بيشربوا لبن‮.. ‬فعليك بماية الفول والعدس او حتي ماية النيل لوحدها وخليهم يعيشوا عيشة أهلهم‮.. ‬وحذاري حذاري حذاري تضعف ولا تتأثر بعياط عيل من عيالك لو شبط في عروسة ولا لعبة من ام زمبلك‮.. ‬لحسن الحركة دي تخليك مديون سنة لقدام‮.. ‬وان شاء الله عيالك يطلعوا معقدين ولا متخلفين حتي‮.. ‬اهي العباسية موجودة‮!‬ - ولو كنت لسه مابعتش التلفزيون اللي حيلتك‮.. ‬وبتشوف الناس اللي بتموت في طوابير العيش كل يوم‮.. ‬فاكيد ح تحرم لوحدك تعدي من قدام فرن من افران العيش وان شا الله ما كلت عيش حاف حتي ده العمر مش بعزقة‮!‬ - اما بالنسبة لبند اللبس والهدوم والكلام الفاضي ده‮.. ‬دي كلها بدع ح توديك جهنم الحمرا‮.. ‬فاكتفي بالهلاهيل اللي عندك انت وعيالك وما تفكرش مجرد التفكير في انك تدخل محل ملابس في وسط البلد ولا اخر البلد حتي لانك مش قد الحاجات دي‮ .. ‬وامشي علي قدك يحتار عدوك فيك‮!‬ - اما بالنسبة لبند التعليم فيستحسن تخرج عيالك م المدارس وتخليهم يسرحوا بأمشاط وفلايات بلا دروس بلا وجع قلب‮.. ‬يعني هما اللي اتعلموا كانوا خدوا ايه؟ - بالنسبة لبند المواصلات فانت ممكن توفره خالص وتروح شغلك ماشي كل يوم وهو منه توفير ومنه رياضة‮.‬ - اما بالنسبة للتليفونات فدي لا انا ولا انت ولا اجعص جعيص يقدر يتكلم فيها حتي لو كان ما عندكش تليفون حتي لانك لو اتكلمت ولا فتحت بؤك ح يقولك ادفع الفاتورة الأول وبعدين ابقي اشتكي‮!‬ - اما بالنسبة لفواتير الكهربا والميٌه والخدمات المشمولة بالضرائب والدمغات ف ح تدفع فيها دم قلبك وانت اقل م اللي في رجلك‮.. ‬ولا مؤاخذة‮!‬ - بالنسبة لبند العلاج فده امره سهل جدا‮.. ‬بطل تاخد ادوية الضغط والسكر والمرارة وخليها تتفقع وتموت وتستريح وتريحنا م الهم والفلس والقرف اللي احنا فيه‮.. ‬وسمعنا سلام الالفية الجديدة وشعار المرحلة القادمة‮ .. ‬وعلي راي المرحومة ستي‮: '‬اللي عاجبه بالكحل يتكحل واللي مش عاجبه يت‮..‬رحل‮!‬

رجالة‮.. ‬ستات‮.. ‬حموات‮.. ‬رحمتك يا رب‮!‬ الرجالة أربع أنواع راجل دريان بنفسه وعارف انه دريان‮.. ‬ده مصيبة‮ ‬سودا‮.. ‬اوعي‮ ‬تعبريه‮!‬ راجل‮ ‬دريان بنفسه وما يعرفش‮ ‬انه دريان‮.. ‬ده مسطول‮.. ‬اوعي تفوقيه‮!‬ راجل مش دريان بنفسه وعارف انه مش دريان‮.. ‬ده مدهول علي عينه لازم تنسيه‮!‬ راجل مش دريان وما يعرفش انه مش دريان‮.. ‬فده لقطة‮.. ‬الحقي اتجوزيه‮!‬ والحموات أربع أنواع حماة دريانة بنفسها وعارفة انها دريانة‮. ‬دي‮ ‬غولة‮.. ‬خلي بالك منها‮!‬ حماة دريانة وما تعرفش انها دريانة‮.. ‬دي قنبلة موقوتة‮.. ‬ابعدي عنها‮!‬ حماة مش دريانة وعارفة انها مش دريانة‮.. ‬دي مصيب سودا‮.. ‬اخلصي‮ ‬منها‮!‬ حماة مش دريانة ومش عارفة انها مش دريانة‮.. ‬دي حماة لقطة‮.. ‬صاحبيها‮!‬ الستات أربع انواع ست دريانة وعارفة أنها دريانة‮.. ‬دي ناصحة خدي‮ ‬منها وأوعي تديها‮!‬ ست دريانة وما تعرفش انها دريانة‮.. ‬دي في الطراوة اوعي تقلديها‮!‬ ست مش دريانة وعاملة أنها مش دريانة‮.. ‬دي بتستهبل‮.. ‬لازم تطنيشها‮!‬ ست مش دريانة ومش عارفة انها مش دريانة‮.. ‬دي تبقي لا مؤاخذة حضرتك‮.. ‬لازم تعالجيها‮!‬

شعري وأنا حرة فيه‮.. ‬شعري افرده واتنيه‮!‬ الشعر تاج المرأة‮.. ‬والحصول علي شعر ناعم وصحي ومفيد هو مشكلة ستات وبنات حوا الدائمة‮.. ‬ولحل هذه المشكلة العويصة اتبعي الخطوات التالية للحفاظ علي شعرك و‮.. ‬تكيدي العوازل‮:‬ 1 - تناولي الغذاء الصحي فالاغذية تؤثر بشكل اساسي في الحصول علي شعر صحي‮ .. ‬زي الخضروات والفواكه بانواعها‮.. ‬يعني طول ما انتي قاعدة قرقشي في خيار وجزر وفلفل اخضر‮.. ‬زي الارانب‮!‬ 2 - اضيفي البهارات بأنواعها الي طعامك البهارات تساهم في توفير التغذية الصحية لشعرك لذلك حاولي اضافتها الي الطعام وخاصة الشوربة او اثناء قلي الخضراوات‮.. ‬اظن عجبتك دي‮!‬ 3 - تجنبي المعلبات والمثلجات لأن الأغذية المعلبة والمشروبات المثلجة مليئة بالمواد الحافظة التي تؤذي الجسم وتعوق عملية الهضم لذلك‮ ‬ينصح بالابتعاد عنها‮.. ‬أهو كله توفير‮!‬ 4 - ابتعدي عن الكيماويات فالمواد الكيماوية تؤدي الي تدمير شعرك علي المدي الطويل لذلك احرصي علي استخدام منظفات الشعر او مرطبات مكونة من المواد الطبيعية‮ .. ‬علي قد ما تقدري‮!‬ 5 - احصلي علي حمام زيت بشكل دائم لأن الحصول علي حمام الزيت‮ (‬جوز الهند‮ ‬واللوز او الزيتون‮) ‬مع تدليك فروة الرأس يؤدي الي تحفيز عملية نمو الشعر ويعطيه قوة وصحة كبيرة‮.. ‬وصحة وعافية‮!‬ 6 - لا تستخدمي الفرشاة وشعرك مبلول‮:‬ اياك ان تقومي بتسريح شعرك بالفرشاة اذا كان مبلولا،‮ ‬وافضل طريقة للشعر المتشابك الرطب هي استخدام مشط خشبي ذي اسنان عريضة من ابو ‮٢ ‬جنيه ونصف‮!‬ 7 - قللي من استخدام مجفف الشعر اذ يؤدي الاستخدام المفرط لمجفف الشعر الي جفافه وتقصف اطرافه،‮ ‬لذلك ينصح ان يترك الشعر ليجف طبيعيا ومن ثم القيام بتسريحه‮.. ‬والطبيعي يوكل‮.‬ 8 - تجنبي التوتر او الضغط النفسي حاولي السيطرة علي الضغوط النفسية باجراء تمارين استرخاء واحرصي علي الحصول علي ساعات نوم كافية لأن ذلك يساعد بشكل كبير علي نمو وتجدد الشعر‮.. ‬لا تعليق‮!‬

لو طلعلك راجل في الضلمة‮ .. ‬يبقي اللهم اجعله خير‮!‬ الحلم تفريغ‮ ‬وانعكاس لما يدور بالعقل الباطن‮.. ‬يعني اللي نفسك فيه ومش قادرة تحققيه‮.. ‬نامي وانتي تنوليه‮.. ‬فلو نمتي جعانة ح تحلمي بسوق العيش والخضار واللحمة‮.. ‬أما لو حلمتي انك بردانة فقومي شدي الغطا‮.. ‬لحسن تستهوي‮!‬ وللأحلام رموز ودلالات خاصة من شأنها أن تحير وتقلق صاحب الحلم‮.. ‬ومن بين هذه الرموز التي تظهر كثيرا في الحلم‮ '‬الراجل‮' ‬بصوره وأشكاله ووظائفه المختلفة علاوة علي ما يرتبط بالرجل من ملابس ومتعلقات‮ (‬كالبنطلون،‮ ‬البدلة‮) ‬وهذه بعض التفسيرات الخاصة بالرجل وملابسه ومتعلقاته‮.. ‬فلو حصل انك شفتي‮ ‬راجل في الحلم اوعي تتسرعي ولا تقومي مفزوعة‮.. ‬بس استعيذي بالله من الشيطان الرجيم وإن شاء الله خير‮.. ‬وعشان تطمني اكتر لما يطلعلك الراجل في المنام وتحتاري في تفسير الحلم‮.. ‬اقرئي الموضوع ده ومش ح تندمي‮.‬ أولا‮: ‬أشكال الرجل في الحلم‮:‬ الرجل الجميل‮ : ‬ظهور الرجل جميلا أو وسيما في الحلم دلالة علي السرور والسعادة‮..‬ أما الرجل القبيح فدليل علي المشاكل الكبيرة أما إذا رأيت في الحلم رجلا‮ ‬كان صديقا قديما لك فإشارة إلي الاضطراب والقلق،‮ ‬بينما رؤية الرجل يرقص في الحلم هي دليل علي اللهو والعبث‮.‬ رأس الرجل‮: ‬رؤية رأس الرجل منفصلة عن الجسد في الحلم دليل علي خيبة أمل كبيرة‮.‬ الساق‮: ‬رؤية الشخص له اكثر من ساقين اشارة إلي الاعمال الكثيرة التي لا يستطيع القيام بها‮.‬ اليد‮: ‬رؤية الرجل ذو اليد البيضاء في الحلم اشارة إلي خصام أو خلاف عائلي،‮ ‬أما إذا حلمت انك تصافحين رجلا فصفقة عمل مع شخص تثقين به‮.‬ الشعر‮: ‬إذا رأيت شعر الرجل طويل في الحلم فمعناه خير‮ ‬غير متوقع سيأتيك قريبا أما إذا رأيت رجل يرتدي شعر مستعار فهو اشارة إلي وجود عدو يعمل للاضرار بك‮.‬ ثانيا‮: ‬ملابس الرجل ومتعلقاته‮:‬ البنطلون‮: ‬رؤية البنطلون في الحلم دليل‮ ‬علي الخداع والمكائد المحيطة بك لكنها لن تنجح‮.‬ أما رؤية البدلة‮: ‬فهي دليل علي أن مشاريعك ناجحة وحظك سعيد‮.‬ الساعة‮: ‬رؤية الساعة الرجالي في المنام رمز إلي المشاكل،‮ ‬وكسر الساعة اشارة إلي صعوبات ستواجهك‮.‬ ثالثا‮: ‬وظائف الرجل في الحلم‮:‬ الطبيب‮: ‬رؤية الطبيب في الحلم دليل علي الصحة الجيدة أما إجراء الطبيب لعملية جراحية فإشارة إلي أن اموالك في خطر‮.‬ الضابط‮: ‬رؤية الضابط في الحلم دليل علي مشاكل يسببها من حولك‮.‬ الحلاق‮: ‬رؤية الحلاق في الحلم فرح وسعادة أما رؤية الرجل يحلق ذقنه يعني دينا‮ ‬ثقيلا سيلحق به‮. ‬أما إذا رأيت حلاقا يقوم بحلاقة ذقنك فصديق مخلص يدفع عنك دينك‮.‬ الخادم‮: ‬رؤية الخادم وهو يقوم بخدمتك علي المائدة فإشارة إلي أخبار سعيدة في الطريق إليك‮. ‬أما إذا رأيت خادما فهي إشارة إلي قيامك بأعمال تافهة‮.‬ الرسام‮: ‬رؤية الرسام في الحلم فأل حسن‮.‬ وسلام كبير قوي للرسامين‮.. ‬مين‮!!‬ وأي خدمة