الحريم لا مؤاخذة - وسنينهم‮!!‬ المطرقة المرة دي نازلة علي راس حواء‮.. ‬بس المطارق مش كلها واحدة‮.. ‬فيه مطرقة حرير‮.. ‬تهفهف مع النسيم‮.. ‬وتعدي وتهدي‮.. ‬تهمس وتلمس‮.. ‬لا تجرح ولا تعلم‮.. ‬وفيه مطرقة خشب صندل‮.. ‬ريحتها حلوة بس بتأدب‮.. ‬توجع وتتعب‮.. ‬وتحذر من الرجعة‮.. ‬والنزوة بعد العلم والتوبة‮.. ‬وتكون آخر نوبة‮.. ‬وفيه مطرقة حديد في حديد‮.. ‬لا تبلي ولا تصدي‮.. ‬تنزل بعزم ما فيها‮.. ‬علي راس المفتري والظالم‮.. ‬راجل أو حرمة أو هانم‮.. ‬وتحط حد للتلاعب والملعنة والنفخ في النار وجلب العكننة والنوع ده عندنا منه كتير‮.. ‬والمطارق ملهاش عدد‮.. ‬واللي يستاهلوها كتير في البلد‮.. ‬همه وأصحابهم الانتيم‮.. ‬أمريكان وصهاينة ومغفلين‮.. ‬ظلمة وطماعين‮.. ‬ومحتكرين‮.. ‬بيقولوا بينهم وبين نفسهم‮.. ‬المطرقة اللي ما تموتش بتقوي‮.. ‬بس مطرقتنا بتموت‮.. ‬واللي عايز يجرب‮.. ‬ذنبه علي جنبه،‮ ‬وجنب اللي بيساعده‮.. ‬وكلامنا طبعا علي - لا مؤاخذة - الحريم‮.‬ الولية‮.. ‬جاية تحكم وتتحكم‮!!‬ الست مارجريت سكوبي سفيرة أمريكا الجديدة في مصر التي ملأت الدنيا تصريحات وقصص وحكايات بمجرد اختيارها للمنصب وقبل قدومها‮ ‬غير الميمون‮.. ‬عن نواياها وأعمالها التي ستقوم بها في مصر والمنطقة‮.. ‬وبمجرد وصولها ماعجبهاش الحال‮.. ‬وقالت في عقل بالها جربي‮.. ‬أهو جس نبض‮.. ‬وأبلغت الحكومة أن الحراسة المقررة للسفارة‮ ‬غير كافية‮.. ‬عايزين كمان‮.. ‬صحيح كده كويس‮.. ‬بس فيه احسن من كده‮.. ‬يعني رضينا بالهم‮.. ‬والهم مش راضي‮.‬ السفارة الأمريكية‮.. ‬أو البيت الأبيض كما يطلق عليه العامة‮.. ‬تسببت في كارثة لأجزاء كبيرة من جاردن سيتي وقصر النيل‮.. ‬الجماعة قفلوا الشوارع المحيطة بالسفارة والمؤدية إليها ومنعوا المرور أو التجول في منطقة تجارية ضخمة‮.. ‬واضطر اصحاب المحال والدكاكين إلي اغلاق أكل عيشهم‮.. ‬والندم علي الشورة المهببة اللي حطتهم قريب من السفارة وأصحاب السفارة‮.‬ سكان المنطقة يعانون‮ .. ‬سياراتهم ممنوعة من توصيلهم لبيوتهم‮.. ‬مرورهم محتاج في الروحة والجاية للاطلاع علي الأوراق والبطاقات ويمكن التفتيش‮.. ‬يعني وقف حال‮.. ‬وحوالين السفارة رتب‮.. ‬رتب‮.. ‬ومدرعات ومصفحات وقوات تدخل سريع جاهزة‮.. ‬وحوالي ‮٠٠١ ‬كاميرا مراقبة تلقط دبة النملة حوالين السفارة‮.. ‬ده‮ ‬غير الحواجز‮ .. ‬والكتل الخرسانية اللي ما نعرفش عملتها بأحدث أجهزة التكنولوجيا للمراقبة‮.. ‬والاعاقة والتشويش ووقف الحال‮.‬ وباختصار أصبحت أمريكا مستوطنة داخل عاصمة مصر‮.. ‬أو ثكنة عسكرية ممنوع الاقتراب والتصوير‮.. ‬والنظر من بعد‮.. ‬وكتب علي أبناء مصر ألا يتحركوا في بلدهم‮.. ‬ويمنعوا من المرور أو قضاء المصالح في بقعة داخل جاردن سيتي وقصر النيل لأنها أصبحت جزءا لا يتجزأ من أمريكا‮ .. ‬ورضينا بالهم والغم والظلم والكرب العظيم‮.. ‬بس ده كله مش راضي‮.. ‬واللي يلقي دلع وما يدلعش يبقي حمار وابن ستين في سبعين الست مارجريت بنت سكوبي وصلت السفارة من هنا وزعابيبها قامت‮.. ‬الحراسة مش كفاية‮.. ‬لابد الحكومة المصرية تزود الحراسة‮.. ‬ما هي السفارة الأمريكية كوم وباقي سفارات دول العالم كوم تاني‮.. ‬يا ست مارجريت يهديكي يرضيكي ابدا‮.. ‬طب ما كان قبلك وولش‮.. ‬ما شاء الله كان عليه‮ ‬غتاتة ماحصلتش‮.. ‬وبعده كان الحاج ريتشارد دوني اللي كان بيمر علي اولياء الله كل يوم‮.. ‬ويحضر الموالد وداخل في الدروشة‮.. ‬وكانوا راضيين وقانعين‮.. ‬والحراسة مية‮.. ‬مية إنما الست مارجريت عاملة فيها أماثل‮.. ‬ومش عاجبها حاجة‮.. ‬وعايزة تعمل لنفسها شخصية‮.. ‬وحكاية ورواية‮.‬ يا ست هي ناقصاكي‮.. ‬العالم مش مستحملك وأنت جاية فايقة ورايقة فاكراها العزبة بتاعة والدك سكوبي‮.. ‬ما كفاية خراب البيوت‮.. ‬وقفل المحلات وقطع العيش‮.. ‬والمعاناة في الداخلة والخارجة‮.. ‬خليتوا الناس طفشت من بيوتها‮.. ‬جاتكوا الهم أنتوا‮ ‬واللي يقف معاكم‮.‬ كان يوم أسود‮ .. ‬من ‮٦٢ ‬سنة‮!!‬ خللينا معاهم‮.. ‬الست المصرية طيبة‮.. ‬وبتصبر كتير‮.. ‬وتتحمل اكتر‮.. ‬ومهما حصل ما تحبش تخرب بيتها بإيدها ولا بايد‮ ‬غيرها‮.. ‬وتعرف ازاي تدبق أمورها وتمشي الحال بأي مبلغ‮.. ‬واللي بيحصل من بعض الستات السنين الاخيرة ده شيء مش طبيعي‮.. ‬شيء دخيل‮.. ‬بعد الدش والفرجة علي اللي يسوي واللي مايسواش‮.. ‬واخبار الدنيا اللي بتدخل علينا زي الهم من كل حتة‮.‬ كل ده كلام معقول‮.. ‬وصحيح في اغلبه‮.. ‬بس مش معناه ان الست المصرية‮ '‬طوبة‮' ‬توديها كده تروح‮.. ‬وتجيبها كده تيجي‮.. ‬وماعندهاش احساس‮.. ‬ولا بتفكر‮.. ‬لأ دي حساسة جدا‮.. ‬وبتفكر كويس قوي‮.. ‬وعمرها ماتنسي الاساءة بس‮ '‬بتخزن‮' ‬زي الجمال‮.. ‬وفي الوقت المناسب‮.. ‬عينك ما تشوف الا النور‮.. ‬ ست من اسكندرية كانت زمان بنت صغيرة واقفة في محل الخردوات بتاع ابوها‮.. ‬فات عليها ابن الحلال‮ .. ‬من ‮62 ‬سنة كان يوم اسود ومهبب وكلمة من هنا‮.. ‬ونكتة من هنا‮.. ‬وخفافة دم‮.. ‬واستظراف بنت‮ ‬الخردواتي قالت عدلك جالك يا بنت‮.. ‬وكلها اسبوع وسحب والدته ودخل البيوت من ابوابها‮.. ‬وقال انا عايزها بالهدوم اللي عليها‮.. ‬انا الحمد لله جاهز من‮ ‬جميعه‮.. ‬وافقت والعيلة زغردت‮ .. ‬وهنوها‮ .. ‬وربنا يتمم بخير‮.. ‬في فترة الخطوبة عرفت انها ح تعيش مع حماتها‮.. ‬والشقة شقتها‮. ‬العريس ما عندوش شقة خاصة بيه‮.. ‬بس قال لها امي دي اطيب واحدة في الدنيا ح تحبيها زي والدتك بالضبط‮.. ‬وحطنا قدام الامر الواقع‮.. ‬وحصل بعد ايام‮.. ‬يا دوب اسبوعين تلاتة فوجئت بيه‮.. ‬بني آدم شرس ما عندوش تفاهم‮.. ‬كلمة والتانية‮.. ‬شتيمة وضرب‮.. ‬معقول يمكن الجواز كله كده‮.. ‬بس انا ما شفتش ابويا بيعمل كده‮.. ‬يمكن ابويا حاجة تانية وسنة وجه الولد‮.. ‬وبعديه البنت‮.. ‬وأمي من ناحية وابويا من ناحية خلاص يا بنتي استحملي انت دلوقت عليكي مسئولية‮.. ‬وولادك اهم حاجة في حياتك‮.. ‬وربنا يخليهم لك‮.. ‬وبكره يملوا عليك البيت‮.. ‬ويبقوا ما شاء الله وتفرحي بيهم وتجوزيهم‮.. ‬وكل البيوت مقفولة علي بلاوي اكتر من كده‮.. ‬والهدوم ياما بتخبي‮.. ‬وتحملت الست عيشة‮.. ‬ورضخت للامر الواقع‮.. ‬واستمرت تداري علي شمعتها‮.. ‬وتربي‮ ‬ولادها وتداري جوزها الشرس واللي في القلب في القلب‮.. ‬ومرت السنين واتخرج الولد والبنت في الجامعة‮.. ‬جالهم عدلهم وعندها اخذت الست بعضها واتجهت الي مكتب تسوية المنازعات في محكمة الاسرة‮.. ‬وطلبت الخلع من زوجها‮.. ‬ضربوا كفا بكف وسألوها متجوزين من امتي؟ قالت كان يوم اسود من ‮62 ‬سنة‮.. ‬حاولوا معها‮ .. ‬وجاء الاقارب والاهل والجيران‮.. ‬ده العمر ما عادش فيه قد اللي فات‮.. ‬قالت لهم لو يوم واحد‮.. ‬سألوها طب وح تعملي ايه؟ قالت بفرحة ح اقعد الايام اللي باقية لي اعبد ربنا‮.. ‬وأدعي‮ ‬ع البعيد‮.. ‬ربنا ينتقم لي منه‮.. ‬والايام تدوخه زي ما دوخني‮.. ‬وتذله زي ما ذلني‮!!‬ هيلاري‮.. ‬وصعايدة أمريكا‮!!‬ ليه‮.. ‬مافيش رجالة‮.. ‬واللا الرجالة خلصت م البلد‮.. ‬عشان تحكمنا حرمة مهما كانت حتي لو هيلاري‮.. ‬صحيح الست منورة عقبال ما تشوف ولادك‮.. ‬ومفنجلة كده ما شاء الله‮.. ‬لأ وإيه؟ عاقلة كمان‮.. ‬وكاملة‮.. ‬واللي استحملته ما كانش حد‮ ‬غيرها يستحمله‮.. ‬تبقي واحدة بالحلاوة دي كلها وجوزها يبص لواحدة تانية؟ معقول فيه ست تتحمل ده‮.. ‬ويبص لمين حتة بنت بتشتغل عنده في البيت الأبيض أيام ما كان في الرياسة‮.. ولما الصحافة زنقت عليه وقعدت له زي العمل الردي‮.. ‬ولاعبوا البنت مونيكا اللي عجبتها الحكاية وقدمت لهم الدليل‮.. ‬وفستانها الأزرق لف العالم كله‮.. ‬وطلعت عليه أفلام ومسرحيات‮.. ‬واضطر كلينتون ان يعترف قدام أمة لا إله إلا الله‮.. ‬وغيرها من الأمم‮.. ‬وكانت فضيحة بجلاجل‮.. ‬واحدة‮ ‬غيرها - الست هيلاري - كان زمان كلينتون ده من سنين متوزع في اكياس بلاستيك علي كل صناديق الزبالة اللي شغالة بالتكنولوجيا فيكي يا أمريكا‮.. ‬ولا مين شاف ولا مين دري‮.‬. انما الست طلعت عاقلة واستحملت وقالت للناس‮: ‬دي نزوة وفراغة عين وكل حاجة ح ترجع لأصلها‮.. ‬وكانت الحقيقة أعقل من البعيد ميت مرة‮.. ‬وطرمخت علي الحكاية‮.. ‬وعملت نفسها نسيتها‮.. ‬والناس كمان نسيوها‮.. ‬وجات الست هيلاري الأيام دي‮.. ‬بعد ما عيلة بوش الله لا يرجعهم خلوها خل وعلقم‮.. ‬وقالت في نفسها والله ما يزين البيت الأبيض‮ ‬غيري‮.. ‬ندخله تاني بس أكون أنا الرئيسة وكلينتون مجرد زوج للرئيسة‮.. ‬بس الحكاية مش ماشية معاها قوي‮.. ‬الأستاذ هيكل بيقول إن ناس كتير في أمريكا لا يمكن يوافقوا تحكمهم واحدة ست‮.. ‬وما قالش العرق الصعيدي ده دخل أمريكا منين‮.. ‬يمكن سكان البلد الاصليين وأصحابها الحقيقيين كانوا صعايدة‮.. ‬والعرق الصعيدي نقح عليهم الأيام دي‮.. ‬وراسهم وألف سيف ما تحكمهم واحدة ست‮.. ‬هيه الرجالة خلصت واللا إيه‮.. ‬بس هيلاري ما استسلمتش وفضلت زي النحلة رايحة جاية‮.. ‬لفت أمريكا ولاية ولاية‮.. ‬وشارع شارع‮.. ‬وبلد بلد‮.. ‬ماسابتش‮.. ‬وقابلت أمم وناس مالهاش عدد‮.. ‬وضحكت ضحكتها اللي تنور الضلمة‮.. ‬واتكلمت والناس اعجبوا بيها‮.. ‬وارتاحوا لطلتها خصوصا ان المرشحين ضدها سبحان الله‮.. ‬ما تشوفش وحش‮.. ‬إنما تقول إيه‮.. ‬الاعجاب شيء والحلاوة شيء‮.. ‬وانتخاب رئيس شيء تاني خصوصا إن ولاد بوش الأب وابنه خلوها هباب‮.. ‬وسودوا وش امريكا في كل حتة‮.. ‬ولسه خيبتهم في العراق مالهاش حد‮.. ‬ووكستهم في افغانستان‮.. ‬وبهدلتهم في إيران ولبنان‮.. ‬جاتهم الغم بوش الكبير والصغير‮.. ‬عموما الأيام الجاية ح تبين حاجات كتير‮.. ‬خصوصا بعد هيلاري ما حست بالموقف‮ .. ‬وخدتها من قصيرها‮ .. ‬وخلعت‮ ..‬وغالبا‮ '‬ماكين‮' ‬هو اللي علي وش الفتة حاليا‮.. ‬مع انه قرب علي التمانين‮.. ‬وكان أسير في فيتنام‮.. ‬وبيقولوا الحكاية دي هرشت له مخه‮.. ‬آدي احنا قاعدين ع الحيطة وبنسمع الزيطة‮.. ‬وجابوا زعيط واللا معيط‮.. ‬أمريكا ح تفضل أمريكا‮.. ‬وآخرتها قريبة إن شاء‮ ‬الله‮.‬ الحريم في‮ ‬يونيو أبواب جهنم في يونيو تتفتح رسمي للي علي الشط قالت يا جمال جسمي يدخل جهنم وراها المعجبين ملايين وف كل فوج الزبانية تلتقي اسمي • • • ح ادخل جهنم ورا اللي جسمها من عاج النص مفتول ونصه مكتنز،‮ ‬رجراج تمثال من الحسن وسط البحر والأمواج وفود تسلم علي التمثال وتسمي • • • وادخل جهنم مع اللي اتشعلقت ع البار وتلتوي وتنفرد لي،‮ ‬في أدب ووقار خلتني أروح للمرة مراتي شيطان الدار أقول لها امتي تبقي طالقة زي أمي • • • وأقول له يا رب تحرقني وأنا عبدك؟ واللي عشق واتعشق خلقك ومن عندك قال لي هناك صنعتي،‮ ‬لكن هنا حكمي بيرم التونسي كيدهن عظيم‮.. ‬بالكندي‮!!‬ ح يروح فين الوزير‮.. ‬مهما كان‮.. ‬وزير خارجية واللا داخلية‮.. ‬واللا‮ ‬غيره‮.. ‬ح يروح فين قدام كيد النسا‮.. ‬أهي فرجت عليه العالم‮.. ‬وفضحته فضيحة بجلاجل‮.. ‬وكانت آخرته سودة بعيد عن القراء‮.‬. والحكاية أن ماكسيم بيرنه وزير خارجية كندا‮.. ‬والشخصية المعروفة قرين كونداليزا رايس وجارها الحدود في الحدود كانت له صديقة‮ '‬انتيم قوي‮' ‬اسمها جولي كويلار‮.. ‬جميلة وذكية وتعرف الأصول ا للي ماشية في كندا وأمريكا ودول الغرب بأكملها‮.. ‬الراجل طول النهار يفكر ويدرس تقارير ويرد علي تليفونات من الشرق والغرب‮.. ‬وكونداليزا وكل تليفون وراه بلوة مسيٌحة‮.. ‬وما حدش يقدر علي كده‮.. ‬والسهر علي راحته واجب‮.. ‬ومن حبنا حبناه وصار متاعنا متاعه‮.. ‬علي رأي شكوكو‮.‬ الوزير من ناحيته ما قصرش وكان شايلها في عينه‮.. ‬وشايل جمايلها علي راسه من فوق وفرضها علي وزارته وعلي الحكومة الكندية وعلي العالم كله فكانت مرافقته الرسمية في معظم تحركاته،‮ ‬خاصة رحلات العمل والمأموريات الطويلة وبدأ ينقل جزءا من شغله المهم إلي بيتها حتي يتمكن من التفرغ‮ ‬لانجازه في رواقة ومن‮ ‬غير مقاطعات ومداخلات ومعوقات وكانت جولي من الذكاء والمحبة بحيث كانت مساعدته‮.. ‬وعرفت الكثير عن عمله‮.. ‬ومشاكله واهتماماته‮.‬. لكن ربما بسبب الحسد‮ ‬أو القر علي الوزير وحبيبته برز عفريت أزرق ودخل في العلاقة مصمما‮ ‬علي إفسادها‮.. ‬وكبرت في دماغ‮ ‬الوزير وقفل دماغه واتغير واتملعن وركبه ستميت عفريت‮.. ‬والقصة أن الوزير علم ازاي - ما نعرفش - أن الحبيبة جولي كانت علي علاقة باثنين قبله‮.. ‬واحد ورا التاني‮.. ‬وده أمر طبيعي يعني كانت ح تحط ا يدها علي خدها وتستني عدلها‮.. ‬وهي كانت تعرف إن عدلها ح يكون هو‮.. ‬والحكاية أصلا ماتهم حد لا الوزير ولا‮ ‬غير الوزير طالما انتهت‮.. ‬بس اللي كبرها في دماغ‮ ‬الوزير إن الاتنين اللي سبقوه كانوا مسجلين خطر‮.. ‬وده اللي عمل له قلق‮.. ‬ناقشها في الأمور دي مع إن الأمور دي تتناقش أصلا‮.. ‬يعني ده شيء متوقع‮.. ‬أمال الحلاوة دي كلها ح تقعد كده؟ الوزير يشير من ناحية‮.. ‬وجولي هي التانية خلاص مش مستحملة‮.. ‬بدأت تشعر م الناحية التانية وكل يوم تزيد المشاكل‮.. ‬والوزير بسلامته خد بعضه وخرج‮ ‬غضبان وأخبرها بانتهاء العلاقة‮.. ‬وتعالي‮.. ‬وشمخ بأنفه‮.‬ جولي ما كدبتش خبر‮. ‬فرزت الورق اللي سابه‮.. ‬واكتشفت إن فيه ورق مهم‮.. ‬وأمور سرية‮.. ‬ووثائق هامة جدا خاصة بحلف الاطلنطي‮.. ‬حملت كل ذلك‮.. ‬وراحت ع التليفزيون‮.. ‬والتليفزون هناك سهل لا أمن ولا تفتيش ولا منع‮.. ‬ولا مواعيد سابقة ولا واسطة ولا‮ ‬غير‮.. ‬لقوا قدامهم كنز‮.. ‬اتفضلي يا ست جولي‮.. ‬وفردت جولي أوراقها المذهلة‮.. ‬وكلمتين تلاتة علي كل وثيقة‮.. ‬والناس مذهولة‮.. ‬وقلبها ح يوقف‮.. ‬وعندما انتهت من العرض والشرح قالت اللي ينطور الورق المهم ده ويبعتره هنا وهنا‮.. ‬وينساه‮.. ‬ده يبقي مسئول‮.. ‬أو ممكن ينفع وزير بذمتكم‮.. ‬وهاجت كندا‮.. ‬واظلمت الدنيا علي وجه الوزير‮.. ‬وقدم استقالته واختفي إلي‮ ‬غير رجعة‮.. ‬احنا بنلعب واللا إيه‮.. ‬وزير‮ ‬واللا اكتر من وزير ح يروح فين قدام كيد النسا؟