قلتلهم و قالولى
بقلم..مرقص اقلاديوس
............................
قالولى..
بتتكلم عن الجمال.
و بتكتب عن الحنان.
زى ما تكون،،،،
مش عايش فى المكان.
و لا حاسس بالزمان.
قلتلهم...
حقكم عليا.
بعد كدة،،،
هأصحى الصبح
أكتب عن الألم.
و بالليل
هأكتب عن الأحزان.
قالولى...
بتكتب عن ربنا.
عايز الناس
تعيش فى السما هنا.
و ناسى،،
أو عامل ناسى
إن البشر
بقى منهم
أقسى من الشياطين.
بيقتلوا بعض
زى ما يكونوا مجانين.
قلتلهم ...
حقكم عليا.
بعد كدة
هأكتب عن القسوة.
و الأيام السودة.
إللى مستنيانا لسة.
معلش،،سامحونى
أنا
مش مطالب
أشرح
حيثيات المكان.
و لا أوضح
تاريخ الزمان
اللى احنا فيه
و. . لا
اللى كان.
أنا بأحلم
ب بكرا يكون.
بأحاول
أقنع الإنسان
يرجع
إللى خلقه ربنا.
و رتب له
قبل ما يخلقه المكان.
و وهبه الحياة
و. خصص له
شمس و قمر
ينوروله طريقه
و يحسب بيهم الزمان.
و كل اللى طلبه منه
عشان مصلحته.
و منحه
وصيته و مشورته.
عشان يضمن
يعيش
زى ما خلقه.
يعيش انسان......
ملاح بحور الحكمة
مرقص اقلاديوس
