حرفي الله عليك يا حرفي
وليتي ونيسي
نصبح عليك ؤ نمسي
ما خليت لي وقت للعديان
ل كنت نحسبهم إخوان
سنهم يضحك لسني
ؤ قلبهم فيه لخديعة
عمري ما نسحاب
الصحبة تتغير
حتى بينها لي الزمان
الله عليك يا حرفي
كل يوم تبان أفكار
تتبلور ف راسي
و تتدون باش
ما يمحيها الزمان
حرفي يا حرفي
يا ونيسي
كل يوم نسقيك بكلام
من كثرة ما شافت عينيا
ؤ داز على راسي
اصبحت مهند ؤما تخاف
تحكي كل شادة ؤ فادة
مصاب يا حرفي تمشي مشيا
زينا ما تخرج على سطر
ولا تنسى نقطة صغيرا
الا و رديت لها البال
صحح يا حرفي النظر
ؤكن ناظر ساهر ما تنام
علاش احرفي ما نحكي
على زمان
كان لهنا ؤ كان لمان
اليوم احرفي
تقطعات الصلة
ؤ تقطعات الارحام
حرفي يا حرفي
اليوم لازم نخرج
على السطر
القلب عمر ؤ ما بقيت
قاد على قهر
النفاق كبر
الخداع ؤ لمكر ما يتصور
حرفي يا حرفي
قيدتني بكبل
ؤجعلتيه خط احمر
واش احرفي أنا أعور
نشوف لمنكر ؤ ما نعبر
نصحتني يا حرفي
نوقف ف وجه الظلم
واليوم أحرفي وليتي
ف كلامك وجعلتني أبكم
اليوم أحرفي أنا نقول لك
لازم نكتب و نعبر
على كل ما يصدر
على الخير و الشر
لازم أحرفي
نسمع صوتي
ؤلازم نوصل
لازم نصبح حر
بحال الطير نحلق
و نجيب لخبر
حرفي راني
ركبت عود من حروفي
و تحزمت بحزام من حكمة
و طلقت عنانه
بعدما وصيتو بالمهل
ما يسابق ريح
ما يتوه وسط الزحمة
عودي عاجبو لمهل
يتفرج و يشوف قرانو
يتعلم الحركة
ماشي عيب مرة يكبو و يطيح
ؤ من كبواتو يتعلم
يوقف من جديد
عودي يا ناس شاف ؤ قاسى
شاف لخو يبيع ف خوه
شاف الحر أصبح ذليل
شاف الظلم
شاف لقهرة و لحكرة
الناس تلفات ف الزواق
و النفاق.....
الصغير يرد لهضرا
ما بقات حشمة
عودي حار آش من طريق
يتبع تقضات لو الحكمة
فاش شاف الرحمة
تقطعات من لقلوب
ؤ كثرات لحروب
عودي وقف و تلف
ما صاب يزيد ولا يرجع.....
مليكة بوبراهيمي
