جاتني لقصيدة 

راكبها لحال
سولتني عل حال شي رجال؟؟؟؟
مابقاو سولو فيها من هادي شحال
بغيت نجاوبها ولساني ثقال!!!!
شحال من مرة سولت وعاودت السؤال؟؟؟؟؟
قالت لي جاوبني ياذاك الزجال؟؟؟؟
خللي لكلام بيني وبينك يطوال!!! 
جاوبني على قد السؤال؟؟؟
واش انت زجال ولا بروال ؟؟؟
ولا غير هاز ك الحال؟؟؟
 خفاف لساني من بعد ما ثقال !!!
قلت ليها أنا شاعر وزجال
عندي شلة ما يتقال 
نزمم لحروف ونقيد لمقال
ندير من القصايد موال
سولتني واش تكتب من الواقع ولا الخيال
ولا مني يهزك الحال؟؟؟؟
قلت ليها قصايد ي من الواقع ماشي الخيال
تحكيها ايامي لايامها!!!
تعاودها حالتي لحالتها!!!
ونزممها ف كناش ايامي
اللي خللى مني 
يعاود لمنو 
وانا نعاود لدمي الحامي 
اللي ديما يفيض
يباث يريض
كيف لعود لدهم
اللي يشوف الغاشي ف حال مظلم 
قالت لي حدك تم. 
راه قلبي تألم 
بلا ما تزيد تتكلم 
سير راك معلم، 
زمم وزيد زمم
بلا ما تشاور ولا تخمم.

بقلم حسن الزايري