(يا ليالي زمان عودي)
وحشتني لمتنا من
الفجرية
امي وخالتي ومرات 
عمي بهية
وحشتني ريحه العيش 
الشمسي ع الطبلية
سخن وطازة والحليب
وقلة المية
وحشني الدفا في الشتاء
وحشتني الحنية
وحشني صوت المكن
والزرع
والنورج والجرن وقت 
العصرية
واصحابي وحبايبي 
ولمتنا سوا 
وحكاوينا وقت المغربية
وبراد الشاي والراكيه 
وعودين قصب مع حدوته
وحكايه وضحكايه
وابوزيد الهلالي نسمعها من
البدايه للنهايه وسهرايه
وحشتني مدرستي 
وشنطة كتبي المتحضرة
وشعبطتي يوماتي
في العربية
وحشتني ضلاية شجرة
الجميز المتأصلة
ياما اكلت منها الله
يا محلاها الله
وحشتني حبيبتي وهي
شايله الجرة
فوق راسها وبتمشي 
متمخطرة
والغمزات فوق خدودها 
منورة
والبسمة فوق شفايفها 
مكسوفة ومتحيرة
والله العظيم كلامي 
من قلبي 
ماهوش فذلكه او منظرة
متفرقين بقالنا سنين
محتاجين حبة بخور
والمبخره
محتاجين لدعوة من
القلب 
ومعجزة من رب الوري
لاجل ماتعود الأيام دي 
ونتلم من تاني 
انا واصحابي ف المندرة