...............لمرايا......عامية.....
لماشاب الراس...
ودفگت دوايه
اتبعثرت لحروف 
أو كثرت البلايا
والعين حزينه بكايه 
گلت مع راسي 
أجي نحتاكمو ل لمرايا 
سمعو يا السامعين
مني هذ لحكايه
گولو بسم الله 
تبعو معايا من البدايه
حتى للنهايه... 
سولت حبيبتي لمرايا
عن صغري وشبابي
گالت لي ...كنت جميل
تگول رايس الولايه
اللبسة والحطة زوينة
بحال قصبة لودايه 
گلت ليها مالكي اليوم تبدلتي
فين حسن النوايا
بهدلتيتي شوهتي گفايا
شحال كذبتي علي
غادي نكتب بك شي شكايه 
البارح كنا ناشطين هزين نفس الرايه
واليوم مقبلتيش تگلسي حذايا
البارح وريتيني وجهي ملاك 
واليوم تلفتي لي لقرايه
علاش ...علاش يا لمرايه
واش قربت النهايه 
تكلمي فكي لي هذ الحجايه
سمعني يا شيخ...
گلس على جنبي، دير هذ التكايه 
تمعن ذيك الشمس الساطعه 
لا بد تغيب ورا ذيك البنايه
شوف القهوة مهما غلات
لا بد تدفگ الغلايه 
واش فهمت المقصود
ولا ما زال خسك شويه قرايه
شوف يا ولدي،كلنا ف هذ الدنيا 
مجرد كرايه....
شرب من الما وتوضى
راه إجي نهار اللي تنشف
ذيك السقايه...
شحال نافقتكم يا غافلين 
زينت ليكم الدنيا...
غرقتكم ف الخطايا
هجرتو الملايكه
وتصاحبتو معاي 
أنا هو الشيطان
راس الفساد والغوايه
درتوني فالعماريه 
زوجتوني بناتكم 
وضربتو معاي الشوايه 
توبو للواحد الديان
تظفرو بالحمايه
يرتاح بالكم... 
أو ربي يرزقكم الهدايه 
راه الزين والجمال ف النفس
ماشي ف لمرايا
شحال من واحد صبغ شعرو
خدعاتو نفسو...
تبع الغوايه...
ونهار جاتو الموت بان الشيب 
نكس الراااايه 
خلا كلشي للورثه 
بلا وصايه...
هنا كملت لحكايه
خذوها حكمهة وعبرة 
لينا وليكم أحسن آيه
قبل ما تغرغر 
والنا س حزينه بكايه
محمد مهداوي