يا بت مالك //////
يا بت مالك ماشيه كدا وسارحه
تتمايلي وعودك شجرة جمال طارحه
محلاكي ووش القمر بتزينه الطرحه
مالك كدا قاسيه يأم العيون جارحه
يا بت حبة رحمه نظرة عنيكي سكاكين
تتمخطري بدلال واحنا الشباب مساكين
براحه عليا يابنيه نقلك تقول سكين
تجرح في قلب الناس وقلوبنا مش ساكتين
عماله تتنطط في صدورنا وقعه طين
شغلتي بيكي القلب وعيونا ليكي حارسين
في الرايحه والجايه صحيوا الكانوا ميتين
يابت يأم القدم عجبان ومتحني
هدي الخطي حبه علي القلوب حني
ركبتي عقلي الخفيف متقولش فيكي جني
ترميني بنظره وتمشي وعلي قلبي تتجني
أنا من العذاب كارهك أمشي بعيد عني
والنعمه متصدقي بعمل عليكي تقيل
والله لو تزعلي مني قلبي يموت مالويل
والدنيا تصبح سواد ونهاري يصبح ليل
متحني علي وأرضي وقوليلي أيه العمل
لو تأمري بالعين أنا أهد ليكي الجبل
وأمشي علي الميه علشان أدوق العسل
وأمسك بأيدي النجوم بس الوداد يتوصل
ولا انتي ليكي رأي شرط الوداد تاني
يا حلوه أنني تأمري وقلبي يقول عيني
وتاخدي مني هنا وأهواكي وأهويني
وأفرش انا حنيني أتمايلي وأتهادي
براحه علي قلبي حبيني عالهادي
قلبي في هواكي خفيف ممكن يروح منك
يدوب بنظرة رضا وأي خبر عنك
واوعي تستغربي من حبي لو جالك
يتمني لو يسعدك وغير أحوالك
شوريلي برضاكي درب القبول سالك
وأنا اخلي كل البلد تسألني عن حالك
وبعد ما نتمم الفرحه مع خالك
والله لحرمهم ولا تاني يشفوكي
مهما اشتكوا لعمك وأخوكي وأبوكي
هتكوني ليا وحدي ومشاعري يخدوكي
وحتي كل الحبايب لو جم يهنوكي
عليكي هقفل قلبي ورموشي يداروكي
يأم الجمال فتان ملكي أنا وقلبي
يا فرحه وأتمنيتك يا هديه من ربي
كلمات !!!! محمد حجي /////