الكلام فيه السم
ارى مانفكر ونخمم
وهي مخممه الحبيب
نعيى مانكنش ونزمم
واللي بغاها الله تمر وحليب
هتوف الحال ماتنتم
لحالو داير طبيب
اللي حسب حسب وتكلم
بحروف القاموس الغريب
بالقواعد تبت واختم
سطور القصيدة بالعيب
زمط حرنط وماحشم
تحايل علينا كي الديب
مضى حروفو وعمم
ماخللى بعيد ولا قريب
تشدق ونطق ماعلم
آش خازن لو الغيب
الكلام فيه السم
واللسان عدو طليب
يجر سواقي بالدم
والحق بالباطل يعيب
وروايح ماتقدر تنشم
ف ساحة حرية التخريب
جراحها هم وغم
وطرز ف اللحم بالتعديب
وبطاين تحت الردم
كانت حرة غرة ماتخيب
عشقها طير المقدم
غصبها ب البرامل ف ادلب
فمحرك السربة نغم
وهلل فرحان بالتشقليب
قرس عل الزناد بروووم
مابقى حجر ولاشجر ف العزيب
هذا حالي ف الشام
هذا زهري هذا النصيب
من عهد النكبة ياالاسلام
وانا نعاني فحقل التجارب
التربة شاهدة عل السلام
اللي طيحنا كي الزبيب
والناعورة دايرة عل الدوام
تشد وتفلت وتغيب
اليوم فيا وغدا فيك الترقام
 ودمعة العين ف اللسان نحيب
بقلم ادريس جبيلو
 المغرب