بعدني ياوطني ع هاك المصطبي 
بكنزة مهترية وايدين مشطبي 
عم تامل بفكري ايام الماضي 
وفرحتي برفقاتي بمدرستي وملعبي 
انا ياوطني فقدت الامان 
فقدت اهلي واصحابي والحنان 
فقدت غفلة عيوني من زمان 
صرت ضايع بدروب مخربي 
صرت فتش عبيتي والحارة 
من كثر الدمار ضيعت الاشارة 
صرت حن لصوت امي تنده للجارة 
تفضلي القهوة عالنار تعالي اشربي 
عم حن لياسمينة الدار 
لصوت الراعي والمزمار 
لخبز التنور طالع من النار 
للقمة طرية نظيفة مرتبي 
معدلي جلد ياشعبي فيق 
كثرت المحن كثر التفريق 
خلونا نمشي نوحد الطريق 
ونرجع لاصلنا اصول مهذبي 
راح ظل ياوطن ناطرك هون 
وكل قطرة من دمي بترابك معجون 
ولو اجتمعوا عليك كل الكون 
لاجلك ياوطن كل شي بيهون 
وراح ظل ناطرك عهاك المصبطي 
 ابو سميح سلمان زهرالدين