على شط ذكرياتى
********************
على بحر ذكرياتى
وقفت عا الشط سرحان
افتكر شطحاتى
وصحابى بتوع زمان
وايام المدرسه
وايام الزوغان
ياترى التقى صاحب
م الشله ف اى مكان
على شط ذكرياتى
لما كنا صغيرين
نجرى نهرب نستخبى
م العيال المقروضين
نلعب الكوره يوماتى
واللى يخسر ليلته طين
على شط ذكرياتى
كنت انا ووحيد وحمدى
نعمل الغداوه عندى
بفتكر ماضى شبابى
واما ف الدبلوم صحابى
عاللى يتعارك قصادى
على شط ذكرياتى
اما رحت لجيش بلادى
كنت يومها عسكرى
صولنا يومها قام جرى
كلنا وجرينا بعده
اجرى ارقد انجلى
كل ده وزمايلى جنبى
على شط ذكرياتى
انت مين
انت فين
بعدها ونعود سنين
للورا مستغربين
هيا مال خطوتنا قلت
والنظر نضارته فين
من سنين
قلبى دق
لام العيال الطيبين
والفرح زيطه ولمه
واما أما
فرحانين
ماحنا كنا صغيرين
على شط ذكرياتى
ذكرياتى دمعه حزين
لما جت ذكرى وفاتك
ياما يام الطيبين
انتى كونتى
جنه بدخلها بحنين
افتكرت الفاتحه وانتى محفظانى
وقلبك الطيب
افتكرتك ... من يومين
على شط ذكرياتى
تاتا تاتا جانا ابنى
تاتا تاتا جانا مين
جانا بنات وبنين
رزق ربى المستخبى
جوه دهاليز السنين
والرزق مش بس الفلوس
متخافوش
لو حاجه قلت
اوعوا تبقوا زعلانين
من سنين
بفتكرها
وراضى راضى
حتى لو غرت يامين
على شط ذكرياتى
ياما كنت بمشى وبجرى
على رجلين
بس لما الصحه تنقص
يرزق الخلاق تلاته
وتاتا تاتا ...
كله من فعل السنين
اللى ينقص فى حياتكم
قابلوه وانتوا مبسوطين
السنين
عندى وعندك
ساعه فرح وساعه جرح
واما تعرف قول امين
افتكر فرحى بولادى
يوم زواجهم واما رزقوا بالبنين
فرحتى باولاد ولادى
هو ده فرحة سنين
أعز الولد هوه ولد ولدك
قول أمين
اما انا راحت عليه
المساله تيجى منين
متصورين
اما اقعد افتكر يوم من سنين
على شط ذكرياتى
اشتريت عكاز اضافى
احتياطى
اشتريته يكون متين
لايتزحلق ف مطره
ولا طين
واما بمشى واحده .... واحده
واجرى واتسربع لمين
كله من فعل السنين
المهم تبقى راضى
والرضا أخره اليمين
السنين
على شط ذكرياتى
من تانى واحنا صغيرين
والبال رايق تمللى
ف الحاره مش مشغولين
ولعب السطوح ف البيت عندى
ووقفه الجمعيه لما نعوزسردين
وكمان اللحمه ام تمانيه وستين
هتقوللى جنيه هقولك ليه
هو احنا كنا مختومين
العمله كانت بالقرش مش بالجنيه
وبرضه مكانوش موجودين
مانا من مواليد ستين
هتقوللى كبير وماله
شاهد على عصرى
ومصرى
كنت ......
كوووووونت
يوماتى اشترى جرانين
حد فيكو يقدر يعمل زيى
ياجيل تسعين
على شط ذكرياتى
افتكرت حياتنا وهيه بالمليم
بعد ماشيلت الغلا والطين
والحياه كانت بسيطه
لا حد عنده اجهزه لكن مبسوطين
ولا ف حياتنا ساعتها دش
ولا غش
افتكرت ساعتها ناسنا الطيبين
على شط ذكرياتى
بمشى بالعكاز يوماتى
حبه امد وحبه هادى
وان تعبت اقعد وانادى
يسمعوا ييجوا ولادى
هو ده حكم السنين...
اصبر ياراضى
على شط ذكرياتى
مش بيموت ماضى
عايش جوه السنين
والذكرى تظهر قصادى
بناسها الطيبين
مهما دفنت الذكرى
تحيا بذكرى الشقيانين
على شط ذكرياتى
ياموج البحر متقوللى
لاول مره اخط كلام
واول مره كنت امشى
واول مره ارمى سلام
واول مره كنت اكل
ف اول مره بعد فطام
على شط ذكرياتى
لعبه الشطرنج تحلى
ويا شله اصدقائى
واللى يكسب منا يكسب
واللى يخسر دوره باقى
نفسى افكر نفسى الاقى
ذكرى من ماضى حياتى
الشاعر اسامه محمد على
كافه الحقوق محفوظه
