★ الساكن البرج العالي ★

يلا كنتِ شوية مسالي ★ جي جنبي اسمع قوالي

و افهم هاذ الموال 

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

يا الساكن البرج العالي ★ دير طلة على قبر خالي

 ما تفيد فيه  اموال

لبس جديد لبس البالي ★ خد النفيس خد الغالي

 ما يَهنَى لك بال 

كُن قاضي ناسَب والي ★ سِير أول كن  فالتالي

ما يدوم غِي لحلال

مهما  تشيّر  و  تشالي ★ و مهما  تلاغي و تلالي

ما  تغيّر أحوال

اِسرِق نهاري و ليالي ★  و اِنهب شمسي و هلالي

خُدْني وزيد الخيال

ما  بْقِيت ْ بك نبالي ★  يوم  عرفتك  تغيّر حالي

و حياتي لك نسال

تقول علِيَّا  بوهــــالي ★ مْفَضّي  ضعيف  مسالي

زيد و باقي ما زال

يلا سكُتت تسالو مالي★ويلا دوِيت تعيب مقالي

باش ترضى محال 

راه سكاتي من هوالي ★ و كلامي معبور  بمكالي

ما نَقْبَل قيل و قال 

راني  ما  لك  مسالي ★ خلّيك  في  همك  طالي

على الله راني عوال

سعيد بقربي و وصالي★غصن زاهي بين دوالي

ماشي بحالك مذبال

 يزيد صحراوي فيلالي★ف طنجة و ماشي شمالي

راجل عايش جوال

لا تقارن طير  ف علالي ★ بغراب فالثلث الخالي

جرّب سِير و سال

يزيد علوي اسماعيلي