الدور على مين
على حلم اتقطع بالسكاكين
قدام الخلق المش فاهمين
لكن جواهم صوت الناى
مخنوق وحزين
الدور على مين
متاخد حلمك بالنبوت
وبوضع اليد
ولان محدش حاسس حد
على ارضك جى الدور بمعاد
وشريط القطر لا هاموا ولاد
ولا سامع صوت
الخلق الماشية بتوب الموت
الدور على مين
على ضحكة ناس عايشين ساكتين
راضين م الدنيا يادوب فتافيت
دايرين تنطيط على لقمه عيش
غامسينها بذل السعى اليها
وتملى الحلق بيبلع فيها
مرار ف مرار
الدور على مين
على حلمى وحلمك يسقط م الكشوفات
من غير شماعه
تعلق حمل من الاخطاء
مش معنى كلامى انك تنساه
مانا عارف ان الحلم ضناك
ومحدش عمرة بينسي ضناه
مكتوبه امانى العمر تعيش وياك
بتمد الخطوة عشان تلقاك
تلقاك
بيموت الصوت الساكن فيك
ويعيش العقل تملى يقول
الدور على مين
ولآمتى هتفضل ساجن نفسك ف الاوهام
ومفكر ان سكاتك بر امان
وكل ما تسمع صوت الناس
بتقول مجانين
هينوبهم ايه من خبط دماغهم ف الجدران
وتملى مفكر نفسك م العاقلين
الدور على مين
ساحة النقاش