الحلم ماسك ف الكفن 



الحلم مخلوع م العيون 
مرمى على قبر البلد 
والخوف ولد 
قدام عيونا بوابات
والقلب مات
مفروش على كل الطرق
وريحة طالعه م الشقوق
فايحة عفن 
الحلم ماسك ف الكفن 
رافض يضيع 
خايف يموت 
مقدرش يحيا ف السكوت 
مقدرش يسكن ف التابوت
وروحه تايهه ف الفضا 
باكيه على عمر انقضا 
جوه البوم الضياع
ورا كل باب 
اسرار كتير 
وعيون بتحلم بالامان 
مسجون يا طير 
حلمك تطير 
وترمى ع الفجر السلام 
مكتوب عليك تفتح عنيك 
متشوفش غير لون البارود 
محروم كمان 
تسمع ف يوم 
غير صرخة مع صوت انفجار
ورا كل باب اشلاء صغار
كانوا ف يوم حلم البلد