ذهب متصوف رحال لمتصوف محتال في خلوته وقال

ما بالكم وبال النور
قال المحتال النور قاطع من اول امبارح
قال المتصوف لا اقصد نور الحبيب المصطفي
اهتز المحتال وعمل حركاته يا حبيبي يا رسول الله يا ابو فاطمه الزهراء حيييييي
هز المتصوف راسه وقال اين واجب الضيافه
رد المحتال والله يا شيخ الانبوبه فاضيه ومفيش فلوس اشتري شاي او اغير الانبوبه
قال المتصوف الضيافه ان تهديني من مما علمك الله ما هو وردك
والله يا شيخ انا لسه منزل ورد تحفه من فضيله الشيخ سنقر من علي النت بس النور قاطع وبطاريه اللاب فاضيه وملحقتش احفظه
مين الشيخ سنقر ده تبع اي طريقه
لا ده ربنا يحفظه انشاء الطريقه السنقريه البدويه الشاذليه طريقه جديده لانج وبيتواصل معنا عبر الشات والنت وبياخد العهد علي الاسكايب
خير خير وده العهد بتاعه ايه
اعاهد الله علي السمع والطاعه للشيخ سنقر وعلي تسديد اشتراكات الطريقه في مواعدها
بس كده
ده كده كتير يا شخنا دي الاشتركات نار بس ربنا مسهلها بنعمل اعمال ونجوز العانس ونطلق الي عاوز يتجوز علي مراته البركه في الشيخ سنقر ده سره باتع وبيبعت لينا ديما ايميلات بكل الوصفات وليه ورش عمل علي النت لتعليم السحر الاسود والابيض والرمادي كمان
بس السحر حرام اخي
لا الشيخ قال لا يفل الحديد الا الحديد احنا بنتعلم السحر الدفاعي والباقي من باب العلم بالشئ
طب ما تفريق الازواج ده سحر اسود
لا الشيخ قال وزره علي طالبه
طب اخي هل تسمح لي بالمبيت عندك وغدا اكمل الترحال ان شاء الله
ده انت تنور من غير كهربا بس الشيخ سنقر علمنا تشيلني واشيلك
يعني ايه اخي
يعني خد التانك ده املاه بنزين علشان نشغل المولد بتاع الكهربا وهتلنا في سكتك كام سندوتش كفته علي كبده علي حلويات من المعلم فشه في اول الحاره وانت حبيبي تبات يوم يومين براحتك
خرج المتصوف هاربا بدينه وترك التانك علي باب الصوفي المحتال وكتب ورقه اللهم اخرجنا من القريه الظالم اهلها