حـدوتـه الضـفـادع الشـقـيـه

كان يا مكان وما يحلى الكلام الا بذكر النبي عليه الصلاة والسلام

كان في زمان غابة اسمها الغابة الخضرا ء كانت غابة كبيرة مليانة شجر طويل وكبير علي جوانبها وفي منتصفها بحيرة زرقاء جميلة على شكل هلال كبير اوي وكان كل الحيوانات بتعتمد على البحيرة دي في شربها واستحمامها وكانت حيوانات كتير بتيجي تقعد ترتاح على ضفاف البحيرة في سلام وامان فالاسد ميهجمش على الغزالة عند البحيرة والثعلب مياكلاش الدجاج اللي عند البحيرة .

ولكن دوام الحال من المحال

صحيت الحيوانات في يوم من الايام على دوشه جامدة جاية من ناحية البحيرة
وقالت الزرافة : خير الله ما اجعله خير ايه اللي بيحصل ده

رد عليها الفيل : يا فتاح يا عليم يا رزاق يا كريم ما تيجي نروح نشوف كلنا
وفعلا راحت حيوانات الغابة عند البحيرة يشوفوا ايه سبب الدوشة دي واول ما وصلوا لقوا ان سبب الدوشة عيلة كبيرة من الضفادع جيت وسكنت البحيرة
واكبر ضفدع فيهم بدأ يكلم وقال بصوت ناعم : نق نق حيوانات الغابة الخضراء الجميلة استقبلونا في بحيرتكم الجميلة احنا ملناش مكان تاني ويا رب نبقي جيران واصحاب علطول
الفيل قاله بصوت جهوري وقوي : اهلا بك دي ارض ربنا الواسعة وكلنا جيران فيها بس خلي بالك البحيرة دي بتاعتنا كلنا ومحدش في الغابة يقدر يستغنى عنها عشان كده كلنا بنحافظ عليها
رد الضفدع الكبير : طبعا طبعا يا سيادة الفيل ده شئ مفهوم

بس للاسف الضفادع مبطلتش تعمل دوشه عند البحيرة وكمان بدأت تضايق الحيوانات تيجي الزرافة تشرب وتنزل برقبتها الطويلة في البحيرة تروح الضفادع الشقية الغلسة تعمل من رقبتها زحليقة ييجي الفيل وعيلتة عشان يستحموا وياخدوا حمام الطين بتاعهم تقعد الضفادع الشقية الغلسة تنط على ضهرهم وزلوماتهم ولما الزرافة والفيل زعقولهم وقالوا عيب كده ردت الضفادع وقالت : اده هو انتم زعلتم ده احنا كنا بنهزر معاكم

والغزالة المسكينة جت تشرب من البحيرة قامت الضفادع زقتها ووقعتها في البحيرة وربنا ستر ان الحصان الشجاع كان هناك وانقذ الغزالة ولما جه يكلم الضفادع قالت له :اده هو انت زعلت ده احنا كنا بنهزر معاكم
وجه القرد عشان يشرب قامت الضفادع رشت عليه مييه اتنرفز القرد جدا لأنه مش بيحب يبل شعره قامت الضفادع قالت له : اده هو انت زعلت ده احنا كنا بنهزر معاكم
حيوانات الغابة بقت لا عارفة تشرب ولا تستحمى ولا ترتاح عند البحيرة الزرقا الجميلة اللي في نص الغابة وكانوا كلهم مضايقين اوي من الضفادع الغلسه الشقية اللي جت البحيرة قام الفيل قال بصوته القوي :لازم نعمل حاجة ده وضع ميتسكتش عليه يا سادة

رد القرد ميمون : انا عندي فكرة
( نوجه سؤال هنا لأطفالنا : تفتكروا ايه هي فكرة القرد الذكي ميمون )ولو فكرة حلوة نشجعة ونستخدمها في القصة ولو فكرة متنفعش نشجعة طبعا ونحاول نطور فيها لغاية ما تصلح للقصة

كمل القرد ميمون كلامه وقال :احنا كلنا نجتمع عند البحيرة بكرة بعد صلاة الظهر والدجاج يجيب كل البيض الفاسد اللي عنده والغزلان تجمع الخضار والفواكهة الفاسدة في الغابة خصوصا الطماطم و السناجب هتجيب لنا البندق والفيل وعيلته مع شلة البط هيكونوا معانا وهيعملوا اصوات كتير بحنجرتهم القوية

وافقت الحيوانات على فكرة القرد وجهزت كل حاجة واجمعوا تاني يوم عند البحيرة بعد صلاة الضهر زي ما اتفقوا وعدوا 1-2-3-وهوب بدات الفيلة والبط في اصدار اصوات وزعجة جدا وبقية الحيوانات قعدت ترمي على الضفادع الطماطم البايزة والبندق الجامد

الضفادع اتضايقت اوي اوي وقعدت تزعق وتقول بس كفاية هو ده برده حق الصحبة والجيران
ردت الحيوانات كلها في صوت واحد : اه ده انت زعلت يا ضفادع احنا كنا بنهزر معاك

رد الضفدع الكبير : ده مش هزار.. الهزار يبسط اللى بتهزر معاه ويفرحه مش يزعله وينرفزه
وسكت الضفدع الكبير وعرف انه هو وعيلته عملوا كده في حيوانات الغابة واكسف اوي من نفسه واعتذروا كلهم وتعاهدوا انهم ميضايقوش حد ابدا في البحيرة وانهم اتعلموا الدرس خلاص ورجعت الغابة الخضراء الكبيرة اللي في وسطها بحيرة زرقا جميلة على شكل هلال تعيش في سلام

توته توته فرغت الحدوته حلوة ولا ملتوته