بحبك ...الاستاذ ابراهيم فهمى المحامى

بحبك / شعر عاميه 
مرّت سنين والكلمه لسّه بتّتكتب
كلمة بحِبِكْ
غرقانة من مطر المشاعر 
من زمانْ
عايمه فى بحر الشوقْ
وف نهر الحنانْ
فيها العبير بيفوحْ
أوّل ما تتشكّل حروفها
فوق الورقْ
أو بين شفايفْ
دبّلها القلقْ
بتنادى طيفك من زمان ْ 
وانتِ الّلى بتسابقى السبقْ
وخْداكِ غُربة مسنحيلْ 
مخْفيّه ورا ألف ليلْ
والخطوه عُمر بيتسرقْ 
بتْطالبى قلبى يجيب دليلْ ؟
حُبّى الدليلْ 
وشعور بخيبة الانتظارْ
أصبح ذليلْ
ومراكب الصبر انتهى
مشوارها الطويلْ
أوقات أحس إنّى انتهيتْ 
يوم م انزويت جوّه نفسى
وابْتعدتْ عن الحياه
ظنّيت كتير إنّك فى يوم راح تفهمينى
أو تحتوينى
أو تجينى فى يوم بفرحه
ترجّعى بيها سنينى
أو إيديكِ تضُمّنى
وتلمّنى
أو تشيلى الخوف من قلب إنظلمْ
طول السنينْ
وإتسرق حتّى فى حِلمه
وإنكتم جوّاه الأنينْ
كل ده يكفيكِ ؟؟؟
ولاّ لسّاه الدليلْ
ولا حُبّى فى الزمان ده مستحيلْ ؟؟
ولاّ كلمة من شفايفكْ
تروى قلبى
شىْ عسيرْ ؟؟؟؟
بقلم / إبراهيم فهمى المحامى
15/12/2014