(عيد الحب) .. بقلم / محمود ناصر

( عيد الحب)
هو انا مستني عيد
لجل ابوحلك بالهيام?
واللا مستني يقولولي
عن تاريخ اليوم دا كام
وانتي محرابي وساحتي
ولهوايا انتي المقام
عشت درويش جنب بابك
قلبي مجذوب بالغرام
هو انا مستني عيد
لجل ابوحلك بالهيام?
وقلبي متوضي ف جبينك
وف عنيكي قام صلاته
يطوف ويسعي جنب منك
يرمي احزانه وآهاته
جوه قلبك اصل قلبك
هو قلبي صحيح بذاته
نفسي اوصفلك غرامي
بس تاه مني الكلام
هو انا مستني عيد
لجل ابوحلك بالهيام?
وانتي فرض وانتي سُنه
وانتي خُلد جوه جنه
قلبي ليكي قال وغني
احلي تراتيل الكلام
هو انا مستني عيد
لجل ابوحلك بالهيام?
دا انتي عيد
كل لحظه جنب منك
هي عيد
كل نظره من عيونك
كل لمسه من كفوفك
كل ما عنيا تشوفك
يبقي عيد
انتي اغلي عيد عليا
انتي عيد الانسجام
هو انا مستني عيد
لجل ابوحلك بالهيام?
***************
محمود ناصر