جارى التحميل
استخدم زر ESC أو رجوع للعودة
من وحي الصوره
ياللي قلبك من حديد
زي تكوينك حديد
خدتي ليه اغلي الحبايب
والفراق اصبح اكيد
قوليله بس مينسانيش
وهو بيدور ع العيش
وان قلبي في بعده عني
مستحيل يقدر يعيش
رافعه ايدي بودعك
عارفه دمعي حيوجعك
بس بادعي ربنا
ليا تاني يرجعك
سامعه صوتك لسه بيرن ف وداني
ودرعاتك مفتوحين دايما عشاني
مين حيمسح دمع عيني لما ابكي
مين حيرسم ضحكتي تاني ف ثواني
لو حنام مسمعش ليله لحكاياتك
لو صحيت الصبح بدري مش لقيتك
يبقي ماتت فرحتي جوه في قلبي
بعت حصالتي لماما واشتريتك
بالامانه ياللي شايله بابا فيكي
اسمعي قلبي المنمنم بيناديكي
ويحلفك لو راجعه تاني بكره بدري
تنزلي له وتجيبيه تاني معاكي
المصدر: ماجدة الطوبجي
(مجلة عشاق الشعر)(1)(ممدوح حنفي)
ساحة النقاش